४. मेत्ताकथा

२२. सावत्थिनिदानं. ‘‘मेत्ताय, भिक्खवे, चेतोविमुत्तिया आसेविताय भाविताय बहुलीकताय यानीकताय वत्थुकताय अनुट्ठिताय परिचिताय सुसमारद्धाय एकादसानिसंसा पाटिकङ्खा. कतमे एकादस? सुखं सुपति, सुखं पटिबुज्झति, न पापकं सुपिनं पस्सति, मनुस्सानं पियो होति, अमनुस्सानं पियो होति, देवता रक्खन्ति, नास्स अग्गि वा विसं वा सत्थं वा कमति, तुवटं चित्तं समाधियति, मुखवण्णो विप्पसीदति, असम्मूळ्हो कालङ्करोति, उत्तरि [उत्तरिं (स्या. पी.) अ. नि. ११.१५ पस्सितब्बा] अप्पटिविज्झन्तो ब्रह्मलोकूपगो होति. मेत्ताय, भिक्खवे, चेतोविमुत्तिया आसेविताय भाविताय बहुलीकताय यानीकताय वत्थुकताय अनुट्ठिताय परिचिताय सुसमारद्धाय – इमे एकादसानिसंसा पाटिकङ्खा’’.

अत्थि अनोधिसो फरणा मेत्ताचेतोविमुत्ति, अत्थि ओधिसो फरणा मेत्ताचेतोविमुत्ति, अत्थि दिसाफरणा मेत्ताचेतोविमुत्ति. कतिहाकारेहि अनोधिसो फरणा मेत्ताचेतोविमुत्ति, कतिहाकारेहि ओधिसो फरणा मेत्ताचेतोविमुत्ति, कतिहाकारेहि दिसाफरणा मेत्ताचेतोविमुत्ति? पञ्चहाकारेहि अनोधिसो फरणा मेत्ताचेतोविमुत्ति, सत्तहाकारेहि ओधिसो फरणा मेत्ताचेतोविमुत्ति, दसहाकारेहि दिसाफरणा मेत्ताचेतोविमुत्ति.

कतमेहि पञ्चहाकारेहि अनोधिसो फरणा मेत्ताचेतोविमुत्ति? सब्बे सत्ता अवेरा अब्यापज्जा [अब्यापज्झा (स्या.)] अनीघा सुखी अत्तानं परिहरन्तु. सब्बे पाणा…पे… सब्बे भूता…पे… सब्बे पुग्गला…पे… सब्बे अत्तभावपरियापन्ना अवेरा अब्यापज्जा अनीघा सुखी अत्तानं परिहरन्तूति. इमेहि पञ्चहाकारेहि अनोधिसो फरणा मेत्ताचेतोविमुत्ति.

कतमेहि सत्तहाकारेहि ओधिसो फरणा मेत्ताचेतोविमुत्ति? सब्बा इत्थियो अवेरा अब्यापज्जा अनीघा सुखी अत्तानं परिहरन्तु. सब्बे पुरिसा…पे… सब्बे अरिया…पे… सब्बे अनरिया…पे… सब्बे देवा…पे… सब्बे मनुस्सा…पे… सब्बे विनिपातिका अवेरा अब्यापज्जा अनीघा सुखी अत्तानं परिहरन्तूति. इमेहि सत्तहाकारेहि ओधिसो फरणा मेत्ताचेतोविमुत्ति.

कतमेहि दसहाकारेहि दिसाफरणा मेत्ताचेतोविमुत्ति? सब्बे पुरत्थिमाय दिसाय सत्ता अवेरा अब्यापज्जा अनीघा सुखी अत्तानं परिहरन्तु. सब्बे पच्छिमाय दिसाय सत्ता…पे… सब्बे उत्तराय दिसाय सत्ता…पे… सब्बे दक्खिणाय दिसाय सत्ता…पे… सब्बे पुरत्थिमाय अनुदिसाय सत्ता…पे… सब्बे पच्छिमाय अनुदिसाय सत्ता…पे… सब्बे उत्तराय अनुदिसाय सत्ता…पे… सब्बे दक्खिणाय अनुदिसाय सत्ता…पे… सब्बे हेट्ठिमाय दिसाय सत्ता…पे… सब्बे उपरिमाय दिसाय सत्ता अवेरा अब्यापज्जा अनीघा सुखी अत्तानं परिहरन्तु. सब्बे पुरत्थिमाय दिसाय पाणा…पे… भूता… पुग्गला… अत्तभावपरियापन्ना… सब्बा इत्थियो… सब्बे पुरिसा… सब्बे अरिया… सब्बे अनरिया… सब्बे देवा… सब्बे मनुस्सा… सब्बे विनिपातिका अवेरा अब्यापज्जा अनीघा सुखी अत्तानं परिहरन्तु. सब्बे पच्छिमाय दिसाय विनिपातिका…पे… सब्बे उत्तराय दिसाय विनिपातिका… सब्बे दक्खिणाय दिसाय विनिपातिका… सब्बे पुरत्थिमाय अनुदिसाय विनिपातिका… सब्बे पच्छिमाय अनुदिसाय विनिपातिका… सब्बे उत्तराय अनुदिसाय विनिपातिका… सब्बे दक्खिणाय अनुदिसाय विनिपातिका… सब्बे हेट्ठिमाय दिसाय विनिपातिका… सब्बे उपरिमाय दिसाय विनिपातिका अवेरा अब्यापज्जा अनीघा सुखी अत्तानं परिहरन्तूति. इमेहि दसहाकारेहि दिसाफरणा मेत्ताचेतोविमुत्ति.

१. इन्द्रियवारो

२३. सब्बेसं सत्तानं पीळनं वज्जेत्वा अपीळनाय, उपघातं वज्जेत्वा अनुपघातेन, सन्तापं वज्जेत्वा असन्तापेन, परियादानं वज्जेत्वा अपरियादानेन, विहेसं वज्जेत्वा अविहेसाय, सब्बे सत्ता अवेरिनो होन्तु मा वेरिनो, सुखिनो होन्तु मा दुक्खिनो, सुखितत्ता होन्तु मा दुक्खितत्ताति – इमेहि अट्ठहाकारेहि सब्बे सत्ते मेत्तायतीति – मेत्ता. तं धम्मं चेतयतीति – चेतो. सब्बब्यापादपरियुट्ठानेहि विमुच्चतीति – विमुत्ति. मेत्ता च चेतो च विमुत्ति चाति – मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – सद्धाय अधिमुच्चति. सद्धिन्द्रियपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – वीरियं पग्गण्हाति. वीरियिन्द्रियपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – सतिं उपट्ठापेति. सतिन्द्रियपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – चित्तं समादहति. समाधिन्द्रियपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – पञ्ञाय पजानाति. पञ्ञिन्द्रियपरिभाविता होति मेत्ताचेतोविमुत्ति.

इमानि पञ्चिन्द्रियानि मेत्ताय चेतोविमुत्तिया आसेवना होन्ति. इमेहि पञ्चहि इन्द्रियेहि मेत्ताचेतोविमुत्ति आसेवीयति. इमानि पञ्चिन्द्रियानि मेत्ताय चेतोविमुत्तिया भावना होन्ति. इमेहि पञ्चहि इन्द्रियेहि मेत्ताचेतोविमुत्ति भावीयति. इमानि पञ्चिन्द्रियानि मेत्ताय चेतोविमुत्तिया बहुलीकता होन्ति. इमेहि पञ्चहि इन्द्रियेहि मेत्ताचेतोविमुत्ति बहुलीकरीयति. इमानि पञ्चिन्द्रियानि मेत्ताय चेतोविमुत्तिया अलङ्कारा होन्ति. इमेहि पञ्चहि इन्द्रियेहि मेत्ताचेतोविमुत्ति स्वालङ्कता होति. इमानि पञ्चिन्द्रियानि मेत्ताय चेतोविमुत्तिया परिक्खारा होन्ति. इमेहि पञ्चहि इन्द्रियेहि मेत्ताचेतोविमुत्ति सुपरिक्खता होति. इमानि पञ्चिन्द्रियानि मेत्ताय चेतोविमुत्तिया परिवारा होन्ति. इमेहि पञ्चहि इन्द्रियेहि मेत्ताचेतोविमुत्ति सुपरिवुता होति. इमानि पञ्चिन्द्रियानि मेत्ताय चेतोविमुत्तिया आसेवना होन्ति, भावना होन्ति, बहुलीकता होन्ति, अलङ्कारा होन्ति, परिक्खारा होन्ति, परिवारा होन्ति, पारिपूरी होन्ति, सहगता होन्ति, सहजाता होन्ति, संसट्ठा होन्ति, सम्पयुत्ता होन्ति, पक्खन्दना होन्ति, पसीदना [संसीदना (क. सी. अट्ठ.)] होन्ति, सन्तिट्ठना होन्ति, विमुच्चना होन्ति, ‘‘एतं सन्त’’न्ति फस्सना होन्ति, यानीकता होन्ति, वत्थुकता होन्ति, अनुट्ठिता होन्ति, परिचिता होन्ति, सुसमारद्धा होन्ति, सुभाविता होन्ति, स्वाधिट्ठिता होन्ति, सुसमुग्गता होन्ति, सुविमुत्ता होन्ति, निब्बत्तेन्ति जोतेन्ति पतापेन्ति.

२. बलवारो

२४. सब्बे सत्ता अवेरिनो होन्तु, खेमिनो होन्तु, सुखिनो होन्तूति – अस्सद्धिये न कम्पति. सद्धाबलपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – कोसज्जे न कम्पति. वीरियबलपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – पमादे न कम्पति. सतिबलपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – उद्धच्चे न कम्पति. समाधिबलपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – अविज्जाय न कम्पति. पञ्ञाबलपरिभाविता होति मेत्ताचेतोविमुत्ति.

इमानि पञ्च बलानि मेत्ताय चेतोविमुत्तिया आसेवना होन्ति. इमेहि पञ्चहि बलेहि मेत्ताचेतोविमुत्ति आसेवीयति. इमानि पञ्च बलानि मेत्ताय चेतोविमुत्तिया भावना होन्ति. इमेहि पञ्चहि बलेहि मेत्ताचेतोविमुत्ति भावीयति. इमानि पञ्च बलानि मेत्ताय चेतोविमुत्तिया बहुलीकता होन्ति. इमेहि पञ्चहि बलेहि मेत्ताचेतोविमुत्ति बहुलीकरीयति. इमानि पञ्च बलानि मेत्ताय चेतोविमुत्तिया अलङ्कारा होन्ति. इमेहि पञ्चहि बलेहि मेत्ताचेतोविमुत्ति स्वालङ्कता होति. इमानि पञ्च बलानि मेत्ताय चेतोविमुत्तिया परिक्खारा होन्ति. इमेहि पञ्चहि बलेहि मेत्ताचेतोविमुत्ति सुपरिक्खता होति. इमानि पञ्च बलानि मेत्ताय चेतोविमुत्तिया परिवारा होन्ति. इमेहि पञ्चहि बलेहि मेत्ताचेतोविमुत्ति सुपरिवुता होति. इमानि पञ्च बलानि मेत्ताय चेतोविमुत्तिया आसेवना होन्ति, भावना होन्ति, बहुलीकता होन्ति, अलङ्कारा होन्ति, परिक्खारा होन्ति, परिवारा होन्ति, पारिपूरी होन्ति, सहगता होन्ति, सहजाता होन्ति, संसट्ठा होन्ति, सम्पयुत्ता होन्ति, पक्खन्दना होन्ति, पसीदना होन्ति, सन्तिट्ठना होन्ति, विमुच्चना होन्ति, ‘‘एतं सन्त’’न्ति फस्सना होन्ति, यानीकता होन्ति, वत्थुकता होन्ति, अनुट्ठिता होन्ति, परिचिता होन्ति, सुसमारद्धा होन्ति, सुभाविता होन्ति, स्वाधिट्ठिता होन्ति, सुसमुग्गता होन्ति, सुविमुत्ता होन्ति निब्बत्तेन्ति जोतेन्ति पतापेन्ति.

३. बोज्झङ्गवारो

२५. सब्बे सत्ता अवेरिनो होन्तु, खेमिनो होन्तु, सुखिनो होन्तूति – सतिं उपट्ठापेति. सतिसम्बोज्झङ्गपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – पञ्ञाय पविचिनाति. धम्मविचयसम्बोज्झङ्गपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – वीरियं पग्गण्हाति. वीरियसम्बोज्झङ्गपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – परिळाहं पटिप्पस्सम्भेति. पीतिसम्बोज्झङ्गपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – दुट्ठुल्लं पटिप्पस्सम्भेति. पस्सद्धिसम्बोज्झङ्गपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – चित्तं समादहति. समाधिसम्बोज्झङ्गपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – ञाणेन किलेसे पटिसङ्खाति. उपेक्खासम्बोज्झङ्गपरिभाविता होति मेत्ताचेतोविमुत्ति.

इमे सत्त बोज्झङ्गा मेत्ताय चेतोविमुत्तिया आसेवना होन्ति. इमेहि सत्तहि बोज्झङ्गेहि मेत्ताचेतोविमुत्ति आसेवीयति. इमे सत्त बोज्झङ्गा मेत्ताय चेतोविमुत्तिया भावना होन्ति. इमेहि सत्तहि बोज्झङ्गेहि मेत्ताचेतोविमुत्ति भावीयति. इमे सत्त बोज्झङ्गा मेत्ताय चेतोविमुत्तिया बहुलीकता होन्ति. इमेहि सत्तहि बोज्झङ्गेहि मेत्ताचेतोविमुत्ति बहुलीकरीयति. इमे सत्त बोज्झङ्गा मेत्ताय चेतोविमुत्तिया अलङ्कारा होन्ति. इमेहि सत्तहि बोज्झङ्गेहि मेत्ताचेतोविमुत्ति स्वालङ्कता होति. इमे सत्त बोज्झङ्गा मेत्ताय चेतोविमुत्तिया परिक्खारा होन्ति. इमेहि सत्तहि बोज्झङ्गेहि मेत्ताचेतोविमुत्ति सुपरिक्खता होति. इमे सत्त बोज्झङ्गा मेत्ताय चेतोविमुत्तिया परिवारा होन्ति. इमेहि सत्तहि बोज्झङ्गेहि मेत्ताचेतोविमुत्ति सुपरिवुता होति. इमे सत्त बोज्झङ्गा मेत्ताय चेतोविमुत्तिया आसेवना होन्ति, भावना होन्ति, बहुलीकता होन्ति, अलङ्कारा होन्ति, परिक्खारा होन्ति, परिवारा होन्ति, पारिपूरी होन्ति, सहगता होन्ति, सहजाता होन्ति, संसट्ठा होन्ति, सम्पयुत्ता होन्ति, पक्खन्दना होन्ति, पसीदना होन्ति, सन्तिट्ठना होन्ति, विमुच्चना होन्ति, ‘‘एतं सन्त’’न्ति फस्सना होन्ति, यानीकता होन्ति, वत्थुकता होन्ति, अनुट्ठिता होन्ति, परिचिता होन्ति, सुसमारद्धा होन्ति, सुभाविता होन्ति, स्वाधिट्ठिता होन्ति, सुसमुग्गता होन्ति, सुविमुत्ता होन्ति, निब्बत्तेन्ति जोतेन्ति पतापेन्ति.

४. मग्गङ्गवारो

२६. सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा पस्सति. सम्मादिट्ठिपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा अभिनिरोपेति. सम्मासङ्कप्पपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा परिग्गण्हाति. सम्मावाचापरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा समुट्ठापेति. सम्माकम्मन्तपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा वोदापेति. सम्माआजीवपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा पग्गण्हाति. सम्मावायामपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा उपट्ठापेति. सम्मासतिपरिभाविता होति मेत्ताचेतोविमुत्ति.

सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा समादहति. सम्मासमाधिपरिभाविता होति मेत्ताचेतोविमुत्ति.

इमे अट्ठ मग्गङ्गा मेत्ताय चेतोविमुत्तिया आसेवना होन्ति. इमेहि अट्ठहि मग्गङ्गेहि मेत्ताचेतोविमुत्ति आसेवीयति. इमे अट्ठ मग्गङ्गा मेत्ताय चेतोविमुत्तिया भावना होन्ति. इमेहि अट्ठहि मग्गङ्गेहि मेत्ताचेतोविमुत्ति भावीयति. इमे अट्ठ मग्गङ्गा मेत्ताय चेतोविमुत्तिया बहुलीकता होन्ति. इमेहि अट्ठहि मग्गङ्गेहि मेत्ताचेतोविमुत्ति बहुलीकरीयति. इमे अट्ठ मग्गङ्गा मेत्ताय चेतोविमुत्तिया अलङ्कारा होन्ति. इमेहि अट्ठहि मग्गङ्गेहि मेत्ताचेतोविमुत्ति स्वालङ्कता होन्ति. इमे अट्ठ मग्गङ्गा मेत्ताय चेतोविमुत्तिया परिक्खारा होन्ति. इमेहि अट्ठहि मग्गङ्गेहि मेत्ताचेतोविमुत्ति सुपरिक्खता होति. इमे अट्ठ मग्गङ्गा मेत्ताय चेतोविमुत्तिया परिवारा होन्ति. इमेहि अट्ठहि मग्गङ्गेहि मेत्ताचेतोविमुत्ति सुपरिवुता होति. इमे अट्ठ मग्गङ्गा मेत्ताय चेतोविमुत्तिया आसेवना होन्ति, भावना होन्ति, बहुलीकता होन्ति, अलङ्कारा होन्ति, परिक्खारा होन्ति, परिवारा होन्ति, पारिपूरी होन्ति, सहगता होन्ति, सहजाता होन्ति, संसट्ठा होन्ति, सम्पयुत्ता होन्ति, पक्खन्दना होन्ति, पसीदना होन्ति, सन्तिट्ठना होन्ति, विमुच्चना होन्ति, ‘‘एतं सन्त’’न्ति फस्सना होन्ति, यानीकता होन्ति, वत्थुकता होन्ति, अनुट्ठिता होन्ति, परिचिता होन्ति, सुसमारद्धा होन्ति, सुभाविता होन्ति, स्वाधिट्ठिता होन्ति, सुसमुग्गता होन्ति, सुविमुत्ता होन्ति निब्बत्तेन्ति जोतेन्ति पतापेन्ति.

२७. सब्बेसं पाणानं…पे… सब्बेसं भूतानं… सब्बेसं पुग्गलानं… सब्बेसं अत्तभावपरियापन्नानं… सब्बासं इत्थीनं… सब्बेसं पुरिसानं… सब्बेसं अरियानं… सब्बेसं अनरियानं… सब्बेसं देवानं… सब्बेसं मनुस्सानं… सब्बेसं विनिपातिकानं पीळनं वज्जेत्वा अपीळनाय, उपघातं वज्जेत्वा अनुपघातेन, सन्तापं वज्जेत्वा असन्तापेन, परियादानं वज्जेत्वा अपरियादानेन, विहेसं वज्जेत्वा अविहेसाय, सब्बे विनिपातिका अवेरिनो होन्तु मा वेरिनो, सुखिनो होन्तु मा दुक्खिनो, सुखितत्ता होन्तु मा दुक्खितत्ताति – इमेहि अट्ठहाकारेहि सब्बे विनिपातिके मेत्तायतीति – मेत्ता. तं धम्मं चेतयतीति – चेतो. सब्बब्यापादपरियुट्ठानेहि विमुच्चतीति – विमुत्ति. मेत्ता च चेतो च विमुत्ति चाति – मेत्ताचेतोविमुत्ति.

सब्बे विनिपातिका अवेरिनो होन्तु, खेमिनो होन्तु, सुखिनो होन्तूति – सद्धाय अधिमुच्चति. सद्धिन्द्रियपरिभाविता होति मेत्ताचेतोविमुत्ति…पे… निब्बत्तेन्ति जोतेन्ति पतापेन्ति.

सब्बेसं पुरत्थिमाय दिसाय सत्तानं…पे… सब्बेसं पच्छिमाय दिसाय सत्तानं… सब्बेसं उत्तराय दिसाय सत्तानं… सब्बेसं दक्खिणाय दिसाय सत्तानं… सब्बेसं पुरत्थिमाय अनुदिसाय सत्तानं… सब्बेसं पच्छिमाय अनुदिसाय सत्तानं… सब्बेसं उत्तराय अनुदिसाय सत्तानं… सब्बेसं दक्खिणाय अनुदिसाय सत्तानं… सब्बेसं हेट्ठिमाय दिसाय सत्तानं… सब्बेसं उपरिमाय दिसाय सत्तानं पीळनं वज्जेत्वा अपीळनाय, उपघातं वज्जेत्वा अनुपघातेन, सन्तापं वज्जेत्वा असन्तापेन, परियादानं वज्जेत्वा अपरियादानेन, विहेसं वज्जेत्वा अविहेसाय, सब्बे उपरिमाय दिसाय सत्ता अवेरिनो होन्तु मा वेरिनो, सुखिनो होन्तु मा दुक्खिनो, सुखितत्ता होन्तु मा दुक्खितत्ताति – इमेहि अट्ठहाकारेहि सब्बे उपरिमाय दिसाय सत्ते मेत्तायतीति – मेत्ता. तं धम्मं चेतयतीति – चेतो. सब्बब्यापादपरियुट्ठानेहि विमुच्चतीति – विमुत्ति. मेत्ता च चेतो च विमुत्ति चाति – मेत्ताचेतोविमुत्ति.

सब्बे उपरिमाय दिसाय सत्ता अवेरिनो होन्तु, खेमिनो होन्तु, सुखिनो होन्तूति – सद्धाय अधिमुच्चति. सद्धिन्द्रियपरिभाविता होति मेत्ताचेतोविमुत्ति…पे… निब्बत्तेन्ति जोतेन्ति पतापेन्ति.

सब्बेसं पुरत्थिमाय दिसाय पाणानं…पे… भूतानं… पुग्गलानं अत्तभावपरियापन्नानं… सब्बासं इत्थीनं… सब्बेसं पुरिसानं… सब्बेसं अरियानं… सब्बेसं अनरियानं… सब्बेसं देवानं… सब्बेसं मनुस्सानं… सब्बेसं विनिपातिकानं… सब्बेसं पच्छिमाय दिसाय विनिपातिकानं… सब्बेसं उत्तराय दिसाय विनिपातिकानं… सब्बेसं दक्खिणाय दिसाय विनिपातिकानं… सब्बेसं पुरत्थिमाय अनुदिसाय विनिपातिकानं… सब्बेसं पच्छिमाय अनुदिसाय विनिपातिकानं… सब्बेसं उत्तराय अनुदिसाय विनिपातिकानं… सब्बेसं दक्खिणाय अनुदिसाय विनिपातिकानं… सब्बेसं हेट्ठिमाय दिसाय विनिपातिकानं… सब्बेसं उपरिमाय दिसाय विनिपातिकानं पीळनं वज्जेत्वा अपीळनाय, उपघातं वज्जेत्वा अनुपघातेन, सन्तापं वज्जेत्वा असन्तापेन, परियादानं वज्जेत्वा अपरियादानेन, विहेसं वज्जेत्वा अविहेसाय, सब्बे उपरिमाय दिसाय विनिपातिका अवेरिनो होन्तु मा वेरिनो, सुखिनो होन्तु मा दुक्खिनो, सुखितत्ता होन्तु मा दुक्खितत्ताति – इमेहि अट्ठहाकारेहि सब्बे उपरिमाय दिसाय विनिपातिके मेत्तायतीति – मेत्ता. तं धम्मं चेतयतीति – चेतो. सब्बब्यापादपरियुट्ठानेहि विमुच्चतीति – विमुत्ति. मेत्ता च चेतो च विमुत्ति चाति – मेत्ताचेतोविमुत्ति.

सब्बे उपरिमाय दिसाय विनिपातिका अवेरिनो होन्तु, खेमिनो होन्तु, सुखिनो होन्तूति – सद्धाय अधिमुच्चति. सद्धिन्द्रियपरिभाविता होति मेत्ताचेतोविमुत्ति.

सब्बे उपरिमाय दिसाय विनिपातिका अवेरिनो होन्तु, खेमिनो होन्तु, सुखिनो होन्तूति – वीरियं पग्गण्हाति. वीरियिन्द्रियपरिभाविता होति मेत्ताचेतोविमुत्ति.

सतिं उपट्ठापेति. सतिन्द्रियपरिभाविता होति मेत्ताचेतोविमुत्ति. चित्तं समादहति. समाधिन्द्रियपरिभाविता होति मेत्ताचेतोविमुत्ति. पञ्ञाय पजानाति. पञ्ञिन्द्रियपरिभाविता होति मेत्ताचेतोविमुत्ति.

इमानि पञ्चिन्द्रियानि मेत्ताय चेतोविमुत्तिया आसेवना होन्ति. इमेहि पञ्चहि इन्द्रियेहि मेत्ताचेतोविमुत्ति आसेवीयति…पे… निब्बत्तेन्ति जोतेन्ति पतापेन्ति.

सब्बे उपरिमाय दिसाय विनिपातिका अवेरिनो होन्तु, खेमिनो होन्तु, सुखिनो होन्तूति – अस्सद्धिये न कम्पति. सद्धाबलपरिभाविता होति मेत्ताचेतोविमुत्ति. कोसज्जे न कम्पति. वीरियबलपरिभाविता होति मेत्ताचेतोविमुत्ति. पमादे न कम्पति. सतिबलपरिभाविता होति मेत्ताचेतोविमुत्ति. उद्धच्चे न कम्पति. समाधिबलपरिभाविता होति मेत्ताचेतोविमुत्ति. अविज्जाय न कम्पति. पञ्ञाबलपरिभाविता होति मेत्ताचेतोविमुत्ति.

इमानि पञ्च बलानि मेत्ताय चेतोविमुत्तिया आसेवना होन्ति. इमेहि पञ्चहि बलेहि मेत्ताचेतोविमुत्ति आसेवीयति…पे… निब्बत्तेन्ति जोतेन्ति पतापेन्ति.

सब्बे उपरिमाय दिसाय विनिपातिका अवेरिनो होन्तु, खेमिनो होन्तु, सुखिनो होन्तूति – सतिं उपट्ठापेति. सतिसम्बोज्झङ्गपरिभाविता होति मेत्ताचेतोविमुत्ति.

पञ्ञाय पविचिनाति. धम्मविचयसम्बोज्झङ्गपरिभाविता होति मेत्ताचेतोविमुत्ति. वीरियं पग्गण्हाति. वीरियसम्बोज्झङ्गपरिभाविता होति मेत्ताचेतोविमुत्ति. परिळाहं पटिप्पस्सम्भेति. पीतिसम्बोज्झङ्गपरिभाविता होति मेत्ताचेतोविमुत्ति. दुट्ठुल्लं पटिप्पस्सम्भेति. पस्सद्धिसम्बोज्झङ्गपरिभाविता होति मेत्ताचेतोविमुत्ति. चित्तं समादहति. समाधिसम्बोज्झङ्गपरिभाविता होति मेत्ताचेतोविमुत्ति. ञाणेन किलेसे पटिसङ्खाति. उपेक्खासम्बोज्झङ्गपरिभाविता होति मेत्ताचेतोविमुत्ति.

इमे सत्त बोज्झङ्गा मेत्ताय चेतोविमुत्तिया आसेवना होन्ति. इमेहि सत्तहि बोज्झङ्गेहि मेत्ताचेतोविमुत्ति आसेवीयति…पे… निब्बत्तेन्ति जोतेन्ति पतापेन्ति.

सब्बे उपरिमाय दिसाय विनिपातिका अवेरिनो होन्तु, खेमिनो होन्तु, सुखिनो होन्तूति – सम्मा पस्सति. सम्मादिट्ठि परिभाविता होति मेत्ताचेतोविमुत्ति. सम्मा अभिनिरोपेति. सम्मासङ्कप्पपरिभाविता होति मेत्ताचेतोविमुत्ति. सम्मा परिग्गण्हाति. सम्मावाचापरिभाविता होति मेत्ताचेतोविमुत्ति. सम्मा समुट्ठापेति. सम्माकम्मन्तपरिभाविता होति मेत्ताचेतोविमुत्ति. सम्मा वोदापेति. सम्मा आजीवपरिभाविता होति मेत्ताचेतोविमुत्ति. सम्मा पग्गण्हाति. सम्मावायामपरिभाविता होति मेत्ताचेतोविमुत्ति. सम्मा उपट्ठाति. सम्मासतिपरिभाविता होति मेत्ताचेतोविमुत्ति. सम्मा समादहति. सम्मासमाधिपरिभाविता होति मेत्ताचेतोविमुत्ति.

इमे अट्ठ मग्गङ्गा मेत्ताय चेतोविमुत्तिया आसेवना होन्ति. इमेहि अट्ठहि मग्गङ्गेहि मेत्ताचेतोविमुत्ति आसेवीयति…पे… इमे अट्ठ मग्गङ्गा मेत्ताय चेतोविमुत्तिया परिभाविता होन्ति. इमेहि अट्ठहि मग्गङ्गेहि मेत्ताचेतोविमुत्ति सुपरिवुता होति. इमे अट्ठ मग्गङ्गा मेत्ताय चेतोविमुत्तिया आसेवना होन्ति, भावना होन्ति, बहुलीकता होन्ति, अलङ्कारा होन्ति, परिक्खारा होन्ति, परिवारा होन्ति, पारिपूरी होन्ति, सहगता होन्ति, सहजाता होन्ति, संसट्ठा होन्ति, सम्पयुत्ता होन्ति, पक्खन्दना होन्ति, पसीदना होन्ति, सन्तिट्ठना होन्ति, विमुच्चना होन्ति, ‘‘एतं सन्त’’न्ति फस्सना होन्ति, यानीकता होन्ति, वत्थुकता होन्ति, अनुट्ठिता होन्ति, परिचिता होन्ति, सुसमारद्धा होन्ति, सुभाविता होन्ति, स्वाधिट्ठिता होन्ति, सुसमुग्गता होन्ति, सुविमुत्ता होन्ति निब्बत्तेन्ति जोतेन्ति पतापेन्तीति.

मेत्ताकथा निट्ठिता.