१४. अधिट्ठानहारसम्पातो

७६. तत्थ कतमो अधिट्ठानो हारसम्पातो?

तस्मा रक्खितचित्तस्स, सम्मासङ्कप्पगोचरोति गाथा. तस्मा रक्खितचित्तस्साति एकत्तता. चित्तं मनो विञ्ञाणं, अयं वेमत्तता. सम्मासङ्कप्पगोचरोति एकत्तता. नेक्खम्मसङ्कप्पो अब्यापादसङ्कप्पो अविहिंसासङ्कप्पो अयं वेमत्तता. सम्मादिट्ठिपुरेक्खारोति एकत्तता. सम्मादिट्ठि नाम यं दुक्खे ञाणं दुक्खसमुदये ञाणं दुक्खनिरोधे ञाणं दुक्खनिरोधगामिनिया पटिपदाय ञाणं मग्गे ञाणं हेतुम्हि ञाणं हेतुसमुप्पन्नेसु धम्मेसु ञाणं पच्चये ञाणं पच्चयसमुप्पन्नेसु धम्मेसु ञाणं, यं तत्थ तत्थ यथाभूतं ञाणदस्सनं अभिसमयो सम्पटिवेधो सच्चागमनं, अयं वेमत्तता. ञत्वान उदयब्बयन्ति एकत्तता, उदयेन अविज्जापच्चया सङ्खारा, सङ्खारपच्चया विञ्ञाणं, एवं सब्बं समुदयो भवति. वयेन अविज्जानिरोधा सङ्खारनिरोधो, एवं सब्बं निरोधो होति, अयं वेमत्तता. थिनमिद्धाभिभू भिक्खूति एकत्तता, थिनं नाम या चित्तस्स अकल्लता अकम्मनियता, मिद्धं नाम यं कायस्स लीनत्तं, अयं वेमत्तता. सब्बा दुग्गतियो जहेति एकत्तता, देवमनुस्से वा उपनिधाय अपाया दुग्गति, निब्बानं वा उपनिधाय सब्बा उपपत्तियो दुग्गति, अयं वेमत्तता.

नियुत्तो अधिट्ठानो हारसम्पातो.