२. तिस्समेत्तेय्यमाणवपुच्छा

६५. ‘‘कोध सन्तुसितो लोके, [इच्चायस्मा तिस्समेत्तेय्यो]

कस्स नो सन्ति इञ्जिता;

को उभन्तमभिञ्ञाय, मज्झे मन्ता न लिप्पति [न पिम्पति (बहूसु)];

कं ब्रूसि महापुरिसोति, को इध सिब्बिनिमच्चगा’’ति [सिब्बनिमच्चगा (सी. स्या.)].

६६. ‘‘कामेसु ब्रह्मचरियवा, [मेत्तेय्याति भगवा]

वीततण्हो सदा सतो;

सङ्खाय निब्बुतो भिक्खु, तस्स नो सन्ति इञ्जिता.

६७. ‘‘सो उभन्तमभिञ्ञाय, मज्झे मन्ता न लिप्पति;

तं ब्रूमि महापुरिसोति, सो इध सिब्बिनिमच्चगा’’ति.

तिस्समेत्तेय्यमाणवपुच्छा दुतिया.