१. अजितमाणवपुच्छा

५७. ‘‘केनस्सु निवुतो लोको, [इच्चायस्मा अजितो]

केनस्सु नप्पकासति;

किस्साभिलेपनं ब्रूसि, किंसु तस्स महब्भयं’’.

५८. ‘‘अविज्जाय निवुतो लोको, [अजिताति भगवा]

वेविच्छा पमादा नप्पकासति;

जप्पाभिलेपनं ब्रूमि, दुक्खमस्स महब्भयं’’.

५९. ‘‘सवन्ति सब्बधि सोता, [इच्चायस्मा अजितो]

सोतानं किं निवारणं;

सोतानं संवरं ब्रूहि, केन सोता पिधिय्यरे’’.

६०. ‘‘यानि सोतानि लोकस्मिं, [अजिताति भगवा]

सति तेसं निवारणं;

सोतानं संवरं ब्रूमि, पञ्ञायेते पिधिय्यरे’’.

६१. ‘‘पञ्ञा चेव सति चापि [सती चेव (सी.)], [इच्चायस्मा अजितो]

नामरूपञ्च मारिस;

एतं मे पुट्ठो पब्रूहि, कत्थेतं उपरुज्झति’’.

६२. ‘‘यमेतं पञ्हं अपुच्छि, अजित तं वदामि ते;

यत्थ नामञ्च रूपञ्च, असेसं उपरुज्झति;

विञ्ञाणस्स निरोधेन, एत्थेतं उपरुज्झति’’.

६३. ‘‘ये च सङ्खातधम्मासे, ये च सेखा [सेक्खा (क.)] पुथू इध;

तेसं मे निपको इरियं, पुट्ठो पब्रूहि मारिस’’.

६४. ‘‘कामेसु नाभिगिज्झेय्य, मनसानाविलो सिया;

कुसलो सब्बधम्मानं, सतो भिक्खु परिब्बजे’’ति.

अजितमाणवपुच्छा पठमा.