६. उपसीवमाणवपुच्छा

९४. ‘‘एको अहं सक्क महन्तमोघं, [इच्चायस्मा उपसीवो]

अनिस्सितो नो विसहामि तारितुं;

आरम्मणं ब्रूहि समन्तचक्खु, यं निस्सितो ओघमिमं तरेय्यं’’.

९५. ‘‘आकिञ्चञ्ञं पेक्खमानो सतिमा, [उपसीवाति भगवा]

नत्थीति निस्साय तरस्सु ओघं;

कामे पहाय विरतो कथाहि, तण्हक्खयं नत्तमहाभिपस्स’’.

९६. ‘‘सब्बेसु कामेसु यो वीतरागो, [इच्चायस्मा उपसीवो]

आकिञ्चञ्ञं निस्सितो हित्वा मञ्ञं;

सञ्ञाविमोक्खे परमे विमुत्तो [धिमुत्तो (क.)], तिट्ठे नु सो तत्थ अनानुयायी’’ [अनानुवायी (स्या. क.)].

९७. ‘‘सब्बेसु कामेसु यो वीतरागो, [उपसीवाति भगवा]

आकिञ्चञ्ञं निस्सितो हित्वा मञ्ञं;

सञ्ञाविमोक्खे परमे विमुत्तो, तिट्ठेय्य सो तत्थ अनानुयायी’’.

९८. ‘‘तिट्ठे चे सो तत्थ अनानुयायी, पूगम्पि वस्सानं समन्तचक्खु;

तत्थेव सो सीतिसिया विमुत्तो, चवेथ विञ्ञाणं तथाविधस्स’’.

९९. ‘‘अच्चि यथा वातवेगेन खित्ता, [उपसीवाति भगवा]

अत्थं पलेति न उपेति सङ्खं;

एवं मुनी नामकाया विमुत्तो, अत्थं पलेति न उपेति सङ्खं’’.

१००. ‘‘अत्थङ्गतो सो उद वा सो नत्थि, उदाहु वे सस्सतिया अरोगो;

तं मे मुनी साधु वियाकरोहि, तथा हि ते विदितो एस धम्मो’’.

१०१. ‘‘अत्थङ्गतस्स न पमाणमत्थि, [उपसीवाति भगवा]

येन नं वज्जुं तं तस्स नत्थि;

सब्बेसु धम्मेसु समूहतेसु, समूहता वादपथापि सब्बे’’ति.

उपसीवमाणवपुच्छा छट्ठी.