४. सालकल्याणिकङ्गपञ्हो

४. ‘‘भन्ते नागसेन, ‘सालकल्याणिकाय एकं अङ्गं गहेतब्ब’न्ति यं वदेसि, कतमं तं एकं अङ्गं गहेतब्ब’’न्ति? ‘‘यथा, महाराज, सालकल्याणिका नाम अन्तोपथवियं येव अभिवड्ढति हत्थसतम्पि भिय्योपि, एवमेव खो, महाराज, योगिना योगावचरेन चत्तारि सामञ्ञफलानि चतस्सो पटिसम्भिदा छळभिञ्ञायो केवलञ्च समणधम्मं सुञ्ञागारे येव परिपूरयितब्बं. इदं, महाराज, सालकल्याणिकाय एकं अङ्गं गहेतब्बं. भासितम्पेतं, महाराज, थेरेन राहुलेन –

‘‘‘सालकल्याणिका नाम, पादपो धरणीरुहो;

अन्तोपथवियं येव, सतहत्थोपि वड्ढति.

‘‘‘यथा कालम्हि सम्पत्ते, परिपाकेन सो दुमो;

उग्गञ्छित्वान एकाहं, सतहत्थोपि वड्ढति.

‘‘‘एवमेवाहं महावीर, सालकल्याणिका विय;

अब्भन्तरे सुञ्ञागारे, धम्मतो अभिवड्ढयि’’’न्ति.

सालकल्याणिकङ्गपञ्हो चतुत्थो.