१. लाबुलतङ्गपञ्हो

१. ‘‘भन्ते नागसेन, ‘लाबुलताय एकं अङ्गं गहेतब्ब’न्ति यं वदेसि, कतमं तं एकं अङ्गं गहेतब्ब’’न्ति? ‘‘यथा, महाराज, लाबुलता तिणे वा कट्ठे वा लताय वा सोण्डिकाहि आलम्बित्वा तस्सूपरि वड्ढति, एवमेव खो, महाराज, योगिना योगावचरेन अरहत्ते अभिवड्ढितुकामेन मनसा आरम्मणं आलम्बित्वा अरहत्ते अभिवड्ढितब्बं. इदं, महाराज, लाबुलताय एकं अङ्गं गहेतब्बं. भासितम्पेतं, महाराज, थेरेन सारिपुत्तेन धम्मसेनापतिना –

‘‘‘यथा लाबुलता नाम, तिणे कट्ठे लताय वा;

आलम्बित्वा सोण्डिकाहि, ततो वड्ढति उप्परि.

‘‘‘तथेव बुद्धपुत्तेन, अरहत्तफलकामिना;

आरम्मणं आलम्बित्वा, वड्ढितब्बं असेक्खफले’’’ति.

लाबुलतङ्गपञ्हो पठमो.