११. अभिजानन्तसतिपञ्हो

११. राजा आह ‘‘भन्ते नागसेन, सब्बा सति अभिजानन्ती उप्पज्जति, उदाहु कटुमिकाव सती’’ति? ‘‘अभिजानन्तीपि, महाराज, कटुमिकापि सती’’ति. ‘‘एवञ्हि खो, भन्ते नागसेन, सब्बा सति अभिजानन्ती, नत्थि कटुमिका सती’’ति? ‘‘यदि नत्थि, महाराज, कटुमिका सति, नत्थि किञ्चि सिप्पिकानं कम्मायतनेहि वा सिप्पायतनेहि वा विज्जाट्ठानेहि वा करणीयं, निरत्थका आचरिया, यस्मा च खो, महाराज, अत्थि कटुमिका सति, तस्मा अत्थि कम्मायतनेहि वा सिप्पायतनेहि वा विज्जाट्ठानेहि वा करणीयं, अत्थो च आचरियेही’’ति.

‘‘कल्लोसि, भन्ते नागसेना’’ति.

अभिजानन्तसतिपञ्हो एकादसमो.

सतिवग्गो छट्ठो.

इमस्मिं वग्गे एकादस पञ्हा.