१०. चिरकतसरणपञ्हो

१०. राजा आह ‘‘भन्ते नागसेन, केन अतीतं चिरकतं सरती’’ति? ‘‘सतिया, महाराजा’’ति. ‘‘ननु, भन्ते नागसेन, चित्तेन सरति नो सतिया’’ति? ‘‘अभिजानासि नु, त्वं महाराज, किञ्चिदेव करणीयं कत्वा पमुट्ठ’’न्ति? ‘‘आम भन्ते’’ति. ‘‘किं नु खो, त्वं महाराज, तस्मिं समये अचित्तको अहोसी’’ति? ‘‘न हि, भन्ते, सति तस्मिं समये नाहोसी’’ति. ‘‘अथ कस्मा, त्वं महाराज, एवमाह ‘चित्तेन सरति, नो सतिया’’’ति?

‘‘कल्लोसि, भन्ते नागसेना’’ति.

चिरकतसरणपञ्हो दसमो.