२. बुद्धस्स अनुत्तरभावपञ्हो

२. राजा आह ‘‘भन्ते नागसेन, बुद्धो अनुत्तरो’’ति? ‘‘आम, महाराज, भगवा अनुत्तरो’’ति. ‘‘कथं, भन्ते नागसेन, अदिट्ठपुब्बं जानासि ‘बुद्धो अनुत्तरो’’’ति? ‘‘तं किं मञ्ञसि, महाराज, येहि अदिट्ठपुब्बो महासमुद्दो, जानेय्युं ते, महाराज, महन्तो खो महासमुद्दो गम्भीरो अप्पमेय्यो दुप्परियोगाहो, यत्थिमा पञ्च महानदियो सततं समितं अप्पेन्ति, सेय्यथिदं, गङ्गा यमुना अचिरवती सरभू मही, नेव तस्स ऊनत्तं वा पूरत्तं वा पञ्ञायती’’ति? ‘‘आम, भन्ते, जानेय्यु’’न्ति. ‘‘एवमेव खो, महाराज, सावके महन्ते परिनिब्बुते पस्सित्वा जानामि ‘भगवा अनुत्तरो’’’ति.

‘‘कल्लोसि, भन्ते नागसेना’’ति.

बुद्धस्स अनुत्तरभावपञ्हो दुतियो.