१०. बुद्धनिदस्सनपञ्हो

१०. राजा आह ‘‘भन्ते नागसेन, बुद्धो अत्थी’’ति? ‘‘आम, महाराज, भगवा अत्थी’’ति. ‘‘सक्का पन, भन्ते नागसेन, बुद्धो निदस्सेतुं इधवा इधवा’’ति? ‘‘परिनिब्बुतो, महाराज, भगवा अनुपादिसेसाय निब्बानधातुया, न सक्का भगवा निदस्सेतुं ‘इध वा इध वा’’’ति.

‘‘ओपम्मं करोही’’ति. ‘‘तं किं मञ्ञसि, महाराज, महतो अग्गिक्खन्धस्स जलमानस्स या अच्चि अत्थङ्गता, सक्का सा अच्चि दस्सेतुं ‘इध वा इध वा’’’ति? ‘‘न हि, भन्ते, निरुद्धा सा अच्चि अप्पञ्ञत्तिं गता’’ति. ‘‘एवमेव खो, महाराज, भगवा अनुपादिसेसाय निब्बानधातुया परिनिब्बुतो अत्थङ्गतो, न सक्का भगवा निदस्सेतुं ‘इध वा इध वा’ ति, धम्मकायेन पन खो, महाराज, सक्का भगवा निदस्सेतुं. धम्मो हि, महाराज, भगवता देसितो’’ति.

‘‘कल्लोसि, भन्ते नागसेना’’ति.

बुद्धनिदस्सनपञ्हो दसमो.

बुद्धवग्गो पञ्चमो.

इमस्मिं वग्गे दस पञ्हा.