२. नागसेनपञ्हो

२. थेरो आह ‘‘लोणं, महाराज, चक्खुविञ्ञेय्य’’न्ति. ‘‘आम, भन्ते, चक्खुविञ्ञेय्य’’न्ति. ‘‘सुट्ठु खो, महाराज, जानाही’’ति. ‘‘किं पन, भन्ते, जिव्हाविञ्ञेय्य’’न्ति? ‘‘आम, महाराज, जिव्हाविञ्ञेय्य’’न्ति. ‘‘किं पन, भन्ते, सब्बं लोणं जिव्हाय विजानाती’’ति? ‘‘आम, महाराज, सब्बं लोणं जिव्हाय विजानाति’’.

‘‘यदि, भन्ते, सब्बं लोणं जिव्हाय विजानाति, किस्स पन तं सकटेहि बलीबद्दा [बलिबद्दा (सी. पी.)] आहरन्ति, ननु लोणमेव आहरितब्ब’’न्ति? ‘‘न सक्का, महाराज, लोणमेव आहरितुं एकतोभावगता एते धम्मा गोचरनानत्तगता लोणं गरुभावो चाति. सक्का पन, महाराज, लोणं तुलाय तुलयितु’’न्ति? ‘‘आम, भन्ते, सक्का’’ति. ‘‘न सक्का, महाराज, लोणं तुलाय तुलयितुं, गरुभावो तुलाय तुलियती’’ति.

‘‘कल्लोसि, भन्ते नागसेना’’ति.

नागसेनपञ्हो दुतियो.