६. पटिसन्धिपञ्हो

६. राजा आह ‘‘भन्ते नागसेन, अत्थि कोचि मतो न पटिसन्दहती’’ति. थेरो आह ‘‘कोचि पटिसन्दहति, कोचि न पटिसन्दहती’’ति. ‘‘को पटिसन्दहति, को न पटिसन्दहती’’ति? ‘‘सकिलेसो, महाराज, पटिसन्दहति, निक्किलेसो न पटिसन्दहती’’ति. ‘‘त्वं पन, भन्ते नागसेन, पटिसन्दहिस्ससी’’ति? ‘‘सचे, महाराज, सउपादानो भविस्सामि पटिसन्दहिस्सामि, सचे अनुपादानो भविस्सामि न पटिसन्दहिस्सामी’’ति.

‘‘कल्लोसि, भन्ते नागसेना’’ति.

पटिसन्धिपञ्हो छट्ठो.