३५७. लटुकिकजातकं (५-१-७)

३९. वन्दामि तं कुञ्जर सट्ठिहायनं, आरञ्ञकं यूथपतिं यसस्सिं;

पक्खेहि तं पञ्जलिकं करोमि, मा मे वधी पुत्तके दुब्बलाय.

४०. वन्दामि तं कुञ्जर एकचारिं, आरञ्ञकं पब्बतसानुगोचरं;

पक्खेहि तं पञ्जलिकं करोमि, मा मे वधी पुत्तके दुब्बलाय;

४१. वमिस्सामि ते लटुकिके पुत्तकानि, किं मे तुवं काहसि दुब्बलासि;

सतं सहस्सानिपि तादिसीनं, वामेन पादेन पपोथयेय्यं.

४२. न हेव सब्बत्थ बलेन किच्चं, बलञ्हि बालस्स वधाय होति;

करिस्सामि ते नागराजा अनत्थं, यो मे वधी पुत्तके दुब्बलाय.

४३. काकञ्च पस्स लटुकिकं, मण्डूकं नीलमक्खिकं;

एते नागं अघातेसुं, पस्स वेरस्स वेरिनं;

तस्मा हि वेरं न कयिराथ, अप्पियेनपि केनचीति.

लटुकिकजातकं सत्तमं.