३५५. घटजातकं (५-१-५)

२९. अञ्ञे सोचन्ति रोदन्ति, अञ्ञे अस्सुमुखा जना;

पसन्नमुखवण्णोसि, कस्मा घट [घत (सी. पी.)] न सोचसि.

३०. नाब्भतीतहरो सोको, नानागतसुखावहो;

तस्मा धङ्क [वंक (पी.)] न सोचामि, नत्थि सोके दुतीयता [सोको दुतीयका (क.)].

३१. सोचं पण्डु किसो होति, भत्तञ्चस्स न रुच्चति;

अमित्ता सुमना होन्ति, सल्लविद्धस्स रुप्पतो.

३२. गामे वा यदि वारञ्ञे, निन्ने वा यदि वा थले;

ठितं मं नागमिस्सति, एवं दिट्ठपदो अहं.

३३. यस्सत्ता नालमेकोव, सब्बकामरसाहरो;

सब्बापि पथवी तस्स, न सुखं आवहिस्सतीति.

घटजातकं पञ्चमं.