८. वरुणवग्गो

७१. यो पुब्बे करणीयानि, पच्छा सो कातुमिच्छति;

वरुणकट्ठ [वरणकट्ठ (सी. पी.)] भञ्जोव, स पच्छा मनुतप्पतीति.

वरुणजातकं पठमं.

७२. अकतञ्ञुस्स पोसस्स, निच्चं विवरदस्सिनो;

सब्बं चे पथविं [पठविं (सी. स्या. पी.)] दज्जा, नेव नं अभिराधयेति.

सीलवहत्थिजातकं दुतियं.

७३. सच्चं किरेवमाहंसु, नरा एकच्चिया इध;

कट्ठं निप्लवितं [विप्लावितं (सी. पी.)] सेय्यो, न त्वेवेकच्चियो नरोति.

सच्चंकिरजातकं ततियं.

७४. साधू सम्बहुला ञाती, अपि रुक्खा अरञ्ञजा;

वातो वहति एकट्ठं, ब्रहन्तम्पि वनप्पतिन्ति.

रुक्खधम्मजातकं चतुत्थं.

७५. अभित्थनय पज्जुन्न, निधिं काकस्स नासय;

काकं सोकाय रन्धेहि, मञ्च सोका पमोचयाति.

मच्छजातकं पञ्चमं.

७६. असङ्कियोम्हि गामम्हि, अरञ्ञे नत्थि मे भयं;

उजुं मग्गं समारूळ्हो, मेत्ताय करुणाय चाति.

असङ्कियजातकं छट्ठं.

७७. उसभा रुक्खा गावियो गवा च, अस्सो कंसो सिङ्गाली [सिगासी (सी. स्या. पी.)] च कुम्भो;

पोक्खरणी च अपाकचन्दनं, लाबूनि सीदन्ति सिला प्लवन्ति.

मण्डूकियो कण्हसप्पे गिलन्ति, काकं सुपण्णा परिवारयन्ति;

तसा वका एळकानं भयाहि, विपरियासो [विपरियायो (स्या. क.)] वत्तति नयिध मत्थीति.

महासुपिनजातकं सत्तमं.

७८. उभो खञ्जा उभो कुणी, उभो विसमचक्खुका [चक्खुला (सी. पी.)];

उभिन्नं पिळका [पीळका (स्या.)] जाता, नाहं पस्सामि इल्लिसन्ति.

इल्लिसजातकं अट्ठमं.

७९. यतो विलुत्ता च हता च गावो, दड्ढानि गेहानि जनो च नीतो;

अथागमा पुत्तहताय पुत्तो, खरस्सरं डिण्डिमं [देण्डिमं (सी. स्या. पी.), डिन्दिमं (क.)] वादयन्तोति.

खरस्सरजातकं नवमं.

८०. यं ते पविकत्थितं पुरे, अथ ते पूतिसरा सजन्ति पच्छा;

उभयं न समेति भीमसेन, युद्धकथा च इदञ्च ते विहञ्ञन्ति.

भीमसेनजातकं दसमं.

वरुणवग्गो [वरणवग्गो (सी. पी.)] अट्ठमो.

तस्सुद्दानं –

वरुणा अकतञ्ञूवरे तु सच्चवरं, सवनप्पतिना च अभित्थनय;

करुणाय सिलाप्लव इल्लिसतो, पुन डिण्डिमपूतिसरेन दसाति.