७. इत्थिवग्गो

६१. असा लोकित्थियो नाम, वेला तासं न विज्जति;

सारत्ता च पगब्भा च, सिखी सब्बघसो यथा;

ता हित्वा पब्बजिस्सामि, विवेकमनुब्रूहयन्ति.

असातमन्तजातकं पठमं.

६२. यं ब्राह्मणो अवादेसि, वीणं समुखवेठितो;

अण्डभूता भता भरिया, तासु को जातु विस्ससेति.

अण्डभूतजातकं दुतियं.

६३. कोधना अकतञ्ञू च, पिसुणा मित्तभेदिका [पिसुणा च विभेदिका (सी. स्या. पी.)];

ब्रह्मचरियं चर भिक्खु, सो सुखं न विहाहसीति [पिहाहिसीति (सी. स्या. पी.), विहायसि (क.)].

तक्कपण्डितजातकं [तक्कजातकं (सी. स्या. पी. अट्ठ.)] ततियं.

६४. मा सु नन्दि इच्छति मं, मा सु सोचि न मिच्छति [न इच्छति (सी. स्या. पी.)];

थीनं भावो दुराजानो, मच्छस्सेवोदके गतन्ति.

दुराजानजातकं चतुत्थं.

६५. यथा नदी च पन्थो च, पानागारं सभा पपा;

एवं लोकित्थियो नाम, नासं कुज्झन्ति पण्डिताति.

अनभिरतिजातकं पञ्चमं.

६६. एका इच्छा पुरे आसि, अलद्धा मुदुलक्खणं;

यतो लद्धा अळारक्खी, इच्छा इच्छं विजायथाति.

मुदुलक्खणजातकं छट्ठं.

६७. उच्छङ्गे देव मे पुत्तो, पथे धावन्तिया पति;

तञ्च देसं न पस्सामि, यतो सोदरियमानयेति [सोदरियं नये (क.)].

उच्छङ्गजातकं सत्तमं.

६८. यस्मिं मनो निविसति, चित्तञ्चापि [चित्तं वापि (कत्थचि)] पसीदति;

अदिट्ठपुब्बके पोसे, कामं तस्मिम्पि विस्ससेति.

साकेतजातकं अट्ठमं.

६९. धिरत्थु तं विसं वन्तं, यमहं जीवितकारणा;

वन्तं पच्चावमिस्सामि [पच्चाहरिस्सामि (क.)], मतं मे जीविता वरन्ति.

विसवन्तजातकं नवमं.

७०. न तं जितं साधु जितं, यं जितं अवजीयति;

तं खो जितं साधु जितं, यं जितं नावजीयतीति.

कुद्दालजातकं दसमं.

इत्थिवग्गो सत्तमो.

तस्सुद्दानं –

सिखीसब्बघसोपि च वीणवरो, पिसुणा मित्तभेदिका नन्दी नदी;

मुदुलक्खण सोदरिया च मनो, विस साधुजितेन भवन्ति दसाति.