६. आसीसवग्गो

५१. आसीसेथेव [आसिंसेथेव (सी. स्या. पी.)] पुरिसो, न निब्बिन्देय्य पण्डितो;

पस्सामि वोहं अत्तानं, यथा इच्छिं तथा अहूति.

महासीलवजातकं पठमं.

५२. वायमेथेव पुरिसो, न निब्बिन्देय्य पण्डितो;

पस्सामि वोहं अत्तानं, उदका थलमुब्भतन्ति.

चूळजनकजातकं दुतियं.

५३. तथेव पुण्णा पातियो, अञ्ञायं वत्तते कथा;

आकारणेन [आकारकेन (सी. स्या. पी.)] जानामि, न चायं भद्दिका सुराति.

पुण्णपातिजातकं ततियं.

५४. नायं रुक्खो दुरारुहो, नपि गामतो आरका;

आकारणेन जानामि, नायं सादुफलो दुमोति.

किंफलजातकं चतुत्थं.

५५. यो अलीनेन चित्तेन, अलीनमनसो नरो;

भावेति कुसलं धम्मं, योगक्खेमस्स पत्तिया;

पापुणे अनुपुब्बेन, सब्बसंयोजनक्खयन्ति.

पञ्चावुधजातकं पञ्चमं.

५६. यो पहट्ठेन चित्तेन, पहट्ठमनसो नरो;

भावेति कुसलं धम्मं, योगक्खेमस्स पत्तिया;

पापुणे अनुपुब्बेन, सब्बसंयोजनक्खयन्ति.

कञ्चनक्खन्धजातकं छट्ठं.

५७. यस्सेते चतुरो धम्मा, वानरिन्द यथा तव;

सच्चं धम्मो धिति [धिती (सी. पी.)] चागो, दिट्ठं सो अतिवत्ततीति.

वानरिन्दजातकं सत्तमं.

५८. यस्सेते च [यस्स एते (सी. पी.)] तयो धम्मा, वानरिन्द यथा तव;

दक्खियं सूरियं पञ्ञा, दिट्ठं सो अतिवत्ततीति.

तयोधम्मजातकं अट्ठमं.

५९. धमे धमे नातिधमे, अतिधन्तञ्हि पापकं;

धन्तेन हि सतं लद्धं, अतिधन्तेन नासितन्ति.

भेरिवादकजातकं नवमं.

६०. धमे धमे नातिधमे, अतिधन्तञ्हि पापकं;

धन्तेनाधिगता भोगा, ते तातो विधमी धमन्ति.

सङ्खधमजातकं दसमं.

आसीसवग्गो छट्ठो.

तस्सुद्दानं –

यथा इच्छिं तथाहुदका थला, सुर सादुफलो च अलीनमनो;

सम्पहट्ठमनो चतुरो च तयो, सतलद्धक भोगधनेन दसाति.