३. कुरुङ्गवग्गो

२१. ञातमेतं कुरुङ्गस्स, यं त्वं सेपण्णि सिय्यसि [सेय्यसि (सी. स्या. पी.)];

अञ्ञं सेपण्णि गच्छामि, न मे ते रुच्चते फलन्ति.

कुरुङ्गमिगजातकं पठमं.

२२. ये कुक्कुरा राजकुलम्हि वद्धा, कोलेय्यका वण्णबलूपपन्ना;

तेमे न वज्झा मयमस्म वज्झा, नायं सघच्चा दुब्बलघातिकायन्ति.

कुक्कुरजातकं दुतियं.

२३. अपि पस्सेन सेमानो, सल्लेभि सल्ललीकतो;

सेय्योव वळवा गोजो [भोज्जो (सी.), भोज्झो (स्या. पी.)], युञ्ज मञ्ञेव सारथीति.

गोजानीय [भोजाजानीय (सी. स्या. पी.)] जातकं ततियं.

२४. यदा यदा यत्थ यदा, यत्थ यत्थ यदा यदा;

आजञ्ञो कुरुते वेगं, हायन्ति तत्थ वाळवाति.

आजञ्ञजातकं चतुत्थं.

२५. अञ्ञमञ्ञेहि तित्थेहि, अस्सं पायेहि सारथि;

अच्चासनस्स पुरिसो, पायासस्सपि तप्पतीति.

तित्थजातकं पञ्चमं.

२६. पुराणचोरान वचो निसम्म, महिळामुखो पोथयमन्वचारी;

सुसञ्ञतानञ्हि वचो निसम्म, गजुत्तमो सब्बगुणेसु अट्ठाति.

महिळामुखजातकं छट्ठं.

२७. नालं कबळं पदातवे, न च पिण्डं न कुसे न घंसितुं;

मञ्ञामि अभिण्हदस्सना, नागो स्नेहमकासि [सिनेहमकासि (सी. स्या. पी.)] कुक्कुरेति.

अभिण्हजातकं सत्तमं.

२८. मनुञ्ञमेव भासेय्य, नामनुञ्ञं कुदाचनं;

मनुञ्ञं भासमानस्स, गरुं भारं उदद्धरि;

धनञ्च नं अलाभेसि, तेन चत्तमनो अहूति.

नन्दिविसालजातकं अट्ठमं.

२९. यतो यतो गरु धुरं, यतो गम्भीरवत्तनी;

तदास्सु कण्हं युञ्जन्ति, स्वास्सु तं वहते धुरन्ति.

कण्हजातकं नवमं.

३०. मा मुनिकस्स पिहयि, आतुरन्नानि भुञ्जति;

अप्पोस्सुक्को भुसं खाद, एतं दीघायुलक्खणन्ति.

मुनिकजातकं दसमं.

कुरुङ्गवग्गो ततियो.

तस्सुद्दानं –

कुरुङ्गस्स कुक्कुरगोजवरो, पुन वाळवस्ससिरिव्हयनो [सिरिवयनो (सब्बत्थ)];

महिळामुखनामनुञ्ञवरो, वहते धुर मुनिकेन दसाति.