४. कुलावकवग्गो

३१. कुलावका मातलि सिम्बलिस्मिं, ईसामुखेन परिवज्जयस्सु;

कामं चजाम असुरेसु पाणं, मा मे दिजा विक्कुलवा [मायिमे दिजा विकुलावा (सी. स्या. पी.)] अहेसुन्ति.

कुलावकजातकं पठमं.

३२. रुदं मनुञ्ञं रुचिरा च पिट्ठि, वेळुरियवण्णूपनिभा [वण्णूपटिभा (स्या.), वण्णसन्निभा (क.)] च गीवा;

ब्याममत्तानि च पेखुणानि, नच्चेन ते धीतरं नो ददामीति.

नच्चजातकं दुतियं.

३३. सम्मोदमाना गच्छन्ति, जालमादाय पक्खिनो;

यदा ते विवदिस्सन्ति, तदा एहिन्ति मे वसन्ति.

सम्मोदमानजातकं ततियं.

३४. न मं सीतं न मं उण्हं, न मं जालस्मि बाधनं;

यञ्च मं मञ्ञते मच्छी, अञ्ञं सो रतिया गतोति.

मच्छजातकं चतुत्थं.

३५. सन्ति पक्खा अपतना, सन्ति पादा अवञ्चना;

मातापिता च निक्खन्ता, जातवेद पटिक्कमाति.

वट्टकजातकं पञ्चमं.

३६. यं निस्सिता जगतिरुहं विहङ्गमा, स्वायं अग्गिं पमुञ्चति;

दिसा भजथ वक्कङ्गा [वङ्कङ्गा (स्या.)], जातं सरणतो भयन्ति.

सकुणजातकं छट्ठं.

३७. ये वुड्ढ [वद्ध (सी. पी.)] मपचायन्ति, नरा धम्मस्स कोविदा;

दिट्ठेव धम्मे पासंसा, सम्पराये च सुग्गतीति.

तित्तिरजातकं सत्तमं.

३८. नाच्चन्तं निकतिप्पञ्ञो, निकत्या सुखमेधति;

आराधेति निकतिप्पञ्ञो [आराधे निकतिप्पञ्ञो (पी.)], बको कक्कटकामिवाति.

बकजातकं अट्ठमं.

३९. मञ्ञे सोवण्णयो रासि, सोण्णमाला च नन्दको;

यत्थ दासो आमजातो, ठितो थुल्लानि [थूलानि (क.)] गज्जतीति.

नन्दजातकं नवमं.

४०. कामं पतामि निरयं, उद्धंपादो अवंसिरो;

नानरियं करिस्सामि, हन्द पिण्डं पटिग्गहाति.

खदिरङ्गारजातकं दसमं.

कुलावकवग्गो चतुत्थो.

तस्सुद्दानं –

सिरिमातलि धीतर पक्खिवरो, रतियागतो मातापिता च पुन;

जगतीरुह वुड्ढ सुकक्कटको, तथा नन्दकपिण्डवरेन दसाति.