१२. हंचिवग्गो

१११. हंचि [हंसि (सी. स्या.), हञ्चि (?)] तुवं एवमञ्ञसि सेय्यो, पुत्तेन पिताति राजसेट्ठ;

हन्दस्सतरस्स ते अयं, अस्सतरस्स हि गद्रभो पिताति.

गद्रभपञ्हजातकं पठमं.

११२. येन सत्तुबिलङ्गा च, दिगुणपलासो च पुप्फितो;

येन ददामि [येना’दामि (सी. स्या.)] तेन वदामि, येन न ददामि [येन ना’दामि (सी. स्या.)] न तेन वदामि;

एस मग्गो यवमज्झकस्स, एतं छन्नपथं विजानाहीति.

अमरादेवीपञ्हजातकं दुतियं.

११३. सद्दहासि सिङ्गालस्स [सिगालस्स (सी. स्या. पी.)], सुरापीतस्स ब्राह्मण;

सिप्पिकानं सतं नत्थि, कुतो कंससता दुवेति.

सिङ्गालजातकं ततियं.

११४. बहुचिन्ती अप्पचिन्ती, उभो जाले अबज्झरे;

मितचिन्ती पमोचेसी, उभो तत्थ समागताति.

मितचिन्तिजातकं चतुत्थं.

११५. यायञ्ञ [यायञ्ञे (क.)] मनुसासति, सयं लोलुप्पचारिनी;

सायं विपक्खिका सेति, हता चक्केन सासिकाति [सालिकाति (सी. स्या. पी.)].

अनुसासिकजातकं पञ्चमं.

११६. अतिकरमकराचरिय, मय्हम्पेतं न रुच्चति;

चतुत्थे लङ्घयित्वान, पञ्चमायसि आवुतोति.

दुब्बचजातकं छट्ठं.

११७. अच्चुग्गतातिलपता [अतिबलता (सी. स्या. पी.), अतिलपका (कत्थचि)], अतिवेलं पभासिता;

वाचा हनति दुम्मेधं, तित्तिरंवातिवस्सितन्ति.

तित्तिरजातकं सत्तमं.

११८. नाचिन्तयन्तो पुरिसो, विसेसमधिगच्छति;

चिन्तितस्स फलं पस्स, मुत्तोस्मि वधबन्धनाति.

वट्टकजातकं अट्ठमं.

११९. अमातापितरसंवद्धो [पितरि (सी. पी.), पितु (स्या.)], अनाचेरकुले वसं;

नायं कालं अकालं वा, अभिजानाति कुक्कुटोति.

अकालराविजातकं नवमं.

१२०. अबद्धा तत्थ बज्झन्ति, यत्थ बाला पभासरे;

बद्धापि तत्थ मुच्चन्ति, यत्थ धीरा पभासरेति.

बन्धनमोक्खजातकं दसमं.

हंचिवग्गो [हंसिवग्गो (सी. स्या.)] द्वादसमो.

तस्सुद्दानं –

अथ गद्रभ सत्तुव कंससतं, बहुचिन्ति सासिकायातिकर;

अतिवेल विसेसमनाचरियोव, धीरापभासरतेन दसाति.