११. परोसतवग्गो

१०१. परोसतं चेपि समागतानं, झायेय्युं ते वस्ससतं अपञ्ञा;

एकोव सेय्यो पुरिसो सपञ्ञो, यो भासितस्स विजानाति अत्थन्ति.

परोसतजातकं पठमं.

१०२. यो दुक्खफुट्ठाय भवेय्य ताणं, सो मे पिता दुब्भि [दूभि (सी. पी.)] वने करोति;

सा कस्स कन्दामि वनस्स मज्झे, यो तायिता सो सहसं [सहसा (सी. स्या. पी.)] करोतीति.

पण्णिकजातकं दुतियं.

१०३. यत्थ वेरी निविसति [निवसति (सी. क.)], न वसे तत्थ पण्डितो;

एकरत्तं दिरत्तं वा, दुक्खं वसति वेरिसूति.

वेरिजातकं ततियं.

१०४. चतुब्भि अट्ठज्झगमा, अट्ठाहिपि च सोळस;

सोळसाहि च बात्तिंस [बत्तिंस (सी. स्या. पी.)], अत्रिच्छं चक्कमासदो;

इच्छाहतस्स पोसस्स, चक्कं भमति मत्थकेति.

मित्तविन्दकजातकं चतुत्थं.

१०५. बहुम्पेतं वने कट्ठं, वातो भञ्जति दुब्बलं;

तस्स चे भायसी नाग, किसो नून भविस्ससीति.

दुब्बलकट्ठजातकं पञ्चमं.

१०६. सुखं वत मं जीवन्तं [सुखकं वत जीवं (क.)], पचमाना उदञ्चनी;

चोरी जायप्पवादेन, तेलं लोणञ्च याचतीति.

उदञ्चनीजातकं छट्ठं.

१०७. साधु खो सिप्पकं नाम, अपि यादिस कीदिसं;

पस्स खञ्जप्पहारेन, लद्धा गामा चतुद्दिसाति.

सालित्तकजातकं सत्तमं.

१०८. सिक्खेय्य सिक्खितब्बानि, सन्ति तच्छन्दिनो [सच्छन्दिनो (सी. पी.)] जना;

बाहिया हि [पि (सी. स्या. पी.)] सुहन्नेन, राजानमभिराधयीति.

बाहियजातकं अट्ठमं.

१०९. यथन्नो पुरिसो होति, तथन्ना तस्स देवता;

आहरेतं कुण्डपूवं [कणं पूवं (सी. पी.)], मा मे भागं विनासयाति.

कुण्डपूवजातकं नवमं.

११०. सब्बसंहारको [सब्बसाहारको (क.)] नत्थि, सुद्धं कङ्गु पवायति;

अलिकं भायतियं धुत्ती, सच्चमाह महल्लिकाति.

सब्बसंहारकपञ्हजातकं दसमं.

परोसतवग्गो एकादसमो.

तस्सुद्दानं –

सपरोसत तायित वेरी पुन, भमचक्कथ नागसिरिव्हयनो;

सुखकञ्च वत सिप्पक बाहिया, कुण्डपूव महल्लिकका च दसाति.