१०. लित्तवग्गो

९१. लित्तं परमेन तेजसा, गिलमक्खं पुरिसो न बुज्झति;

गिल रे गिल पापधुत्तक, पच्छा ते कटुकं भविस्सतीति.

लित्तजातकं पठमं.

९२. उक्कट्ठे सूरमिच्छन्ति, मन्तीसु अकुतूहलं;

पियञ्च अन्नपानम्हि, अत्थे जाते च पण्डितन्ति.

महासारजातकं दुतियं.

९३. न विस्ससे अविस्सत्थे, विस्सत्थेपि न विस्ससे;

विस्सासा भयमन्वेति, सीहंव मिगमातुकाति [मिगमातुया (क.)].

विसासभोजनजातकं ततियं.

९४. सोतत्तो सोसिन्दो [सोसीतो (सी. स्या. पी.), सोसिनो (क.)] चेव, एको भिंसनके वने;

नग्गो न चग्गिमासीनो, एसनापसुतो मुनीति.

लोमहंसजातकं चतुत्थं.

९५. अनिच्चा वत सङ्खारा, उप्पादवयधम्मिनो;

उप्पज्जित्वा निरुज्झन्ति, तेसं वूपसमो सुखोति.

महासुदस्सनजातकं पञ्चमं.

९६. समतित्तिकं अनवसेकं, तेलपत्तं यथा परिहरेय्य;

एवं सचित्तमनुरक्खे, पत्थयानो दिसं अगतपुब्बन्ति.

तेलपत्तजातकं छट्ठं.

९७. जीवकञ्च मतं दिस्वा, धनपालिञ्च दुग्गतं;

पन्थकञ्च वने मूळ्हं, पापको पुनरागतोति.

नामसिद्धिजातकं सत्तमं.

९८. साधु खो पण्डितो नाम, न त्वेव अतिपण्डितो;

अतिपण्डितेन पुत्तेन, मनम्हि उपकूळितोति [उपकूलितोति (सी.), उपकुट्ठितोति (स्या.), उपकुटितो (क.)].

कूटवाणिजजातकं अट्ठमं.

९९. परोसहस्सम्पि समागतानं, कन्देय्युं ते वस्ससतं अपञ्ञा;

एकोव सेय्यो पुरिसो सपञ्ञो, यो भासितस्स विजानाति अत्थन्ति.

परोसहस्सजातकं नवमं.

१००. असातं सातरूपेन, पियरूपेन अप्पियं;

दुक्खं सुखस्स रूपेन, पमत्तमतिवत्ततीति.

असातरूपजातकं दसमं.

लित्तवग्गो दसमो.

तस्सुद्दानं –

गिलमक्खकुतूहल मातुकस्सा, मुनिना च अनिच्चत पत्तवरं;

धनपालिवरो अतिपण्डितको, सपरोसहस्सअसातदसाति.

मज्झिमो पण्णासको.