४. सन्ततरसुत्तं

७३. वुत्तञ्हेतं भगवता, वुत्तमरहताति मे सुतं –

‘‘रूपेहि, भिक्खवे, अरूपा [आरुप्पा (सी.)] सन्ततरा, अरूपेहि निरोधो सन्ततरो’’ति. एतमत्थं भगवा अवोच. तत्थेतं इति वुच्चति –

‘‘ये च रूपूपगा सत्ता, ये च अरूपट्ठायिनो [आरुप्पट्ठायिनो (सी.)];

निरोधं अप्पजानन्ता, आगन्तारो पुनब्भवं.

‘‘ये च रूपे परिञ्ञाय, अरूपेसु असण्ठिता;

निरोधे ये विमुच्चन्ति, ते जना मच्चुहायिनो.

‘‘कायेन अमतं धातुं, फुसयित्वा निरूपधिं;

उपधिप्पटिनिस्सग्गं, सच्छिकत्वा अनासवो;

देसेति सम्मासम्बुद्धो, असोकं विरजं पद’’न्ति.

अयम्पि अत्थो वुत्तो भगवता, इति मे सुतन्ति. चतुत्थं.