६. तेमियचरिया

४८. ‘‘पुनापरं यदा होमि, कासिराजस्स अत्रजो;

मूगपक्खोति नामेन, तेमियोति वदन्ति मं.

४९. ‘‘सोळसित्थिसहस्सानं, न विज्जति पुमो तदा [सदा (सी.)];

अहोरत्तानं अच्चयेन, निब्बत्तो अहमेकको.

५०. ‘‘किच्छा लद्धं पियं पुत्तं, अभिजातं जुतिन्धरं;

सेतच्छत्तं धारयित्वान, सयने पोसेति मं पिता.

५१. ‘‘निद्दायमानो सयनवरे, पबुज्झित्वानहं तदा;

अद्दसं पण्डरं छत्तं, येनाहं निरयं गतो.

५२. ‘‘सह दिट्ठस्स मे छत्तं, तासो उप्पज्जि भेरवो;

विनिच्छयं समापन्नो, ‘कथाहं इमं मुञ्चिस्सं’.

५३. ‘‘पुब्बसालोहिता मय्हं, देवता अत्थकामिनी;

सा मं दिस्वान दुक्खितं, तीसु ठानेसु योजयि.

५४. ‘‘‘मा पण्डिच्चयं विभावय, बालमतो भव सब्बपाणिनं;

सब्बो तं जनो ओचिनायतु, एवं तव अत्थो भविस्सति’.

५५. ‘‘एवं वुत्तायहं तस्सा, इदं वचनमब्रविं;

‘करोमि ते तं वचनं, यं त्वं भणसि देवते;

अत्थकामासि मे अम्म, हितकामासि देवते’.

५६. ‘‘तस्साहं वचनं सुत्वा, सागरेव थलं लभिं;

हट्ठो संविग्गमानसो, तयो अङ्गे अधिट्ठहिं.

५७. ‘‘मूगो अहोसिं बधिरो, पक्खो गतिविवज्जितो;

एते अङ्गे अधिट्ठाय, वस्सानि सोळसं वसिं.

५८. ‘‘ततो मे हत्थपादे च, जिव्हं सोतञ्च मद्दिय;

अनूनतं मे पस्सित्वा, ‘काळकण्णी’ति निन्दिसुं.

५९. ‘‘ततो जानपदा सब्बे, सेनापतिपुरोहिता;

सब्बे एकमना हुत्वा, छड्डनं अनुमोदिसुं.

६०. ‘‘सोहं तेसं मतिं सुत्वा, हट्ठो संविग्गमानसो;

यस्सत्थाय तपोचिण्णो, सो मे अत्थो समिज्झथ.

६१. ‘‘न्हापेत्वा अनुलिम्पित्वा, वेठेत्वा राजवेठनं;

छत्तेन अभिसिञ्चित्वा, कारेसुं पुरं पदक्खिणं.

६२. ‘‘सत्ताहं धारयित्वान, उग्गते रविमण्डले;

रथेन मं नीहरित्वा, सारथी वनमुपागमि.

६३. ‘‘एकोकासे रथं कत्वा, सज्जस्सं हत्थमुच्चितो [हत्थमुञ्चितो (सी. स्या.)];

सारथी खणती कासुं, निखातुं पथविया ममं.

६४. ‘‘अधिट्ठितमधिट्ठानं, तज्जेन्तो विविधकारणा;

न भिन्दिं तमधिट्ठानं, बोधियायेव कारणा.

६५. ‘‘मातापिता न मे देस्सा, अत्ता मे न च देस्सियो;

सब्बञ्ञुतं पियं मय्हं, तस्मा वतमधिट्ठहिं.

६६. ‘‘एते अङ्गे अधिट्ठाय, वस्सानि सोळसं वसिं;

अधिट्ठानेन मे समो नत्थि, एसा मे अधिट्ठानपारमी’’ति.

तेमियचरियं छट्ठं.