५. एकसञ्ञकत्थेरअपदानं

१८. ‘‘खण्डो नामासि नामेन, विपस्सिस्सग्गसावको;

एका भिक्खा मया दिन्ना, लोकाहुतिपटिग्गहे.

१९. ‘‘तेन चित्तप्पसादेन, द्विपदिन्द नरासभ;

दुग्गतिं नाभिजानामि, एकभिक्खायिदं फलं.

२०. ‘‘चत्तालीसम्हितो कप्पे, वरुणो नाम खत्तियो;

सत्तरतनसम्पन्नो, चक्कवत्ती महब्बलो.

२१. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा एकसञ्ञको थेरो इमा गाथायो अभासित्थाति.

एकसञ्ञकत्थेरस्सापदानं पञ्चमं.