८. नागसमालवग्गो

१. नागसमालत्थेरअपदानं

१. ‘‘अपाटलिं अहं पुप्फं, उज्झितं सुमहापथे;

थूपम्हि अभिरोपेसिं, सिखिनो लोकबन्धुनो.

२. ‘‘एकत्तिंसे इतो कप्पे, यं कम्ममकरिं तदा;

दुग्गतिं नाभिजानामि, थूपपूजायिदं फलं.

३. ‘‘इतो पन्नरसे कप्पे, भूमियो [पुप्फियो (स्या.)] नाम खत्तियो;

सत्तरतनसम्पन्नो, चक्कवत्ती महब्बलो.

४. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा नागसमालो थेरो इमा गाथायो अभासित्थाति.

नागसमालत्थेरस्सापदानं पठमं.

२. पदसञ्ञकत्थेरअपदानं

५. ‘‘अक्कन्तञ्च पदं दिस्वा, तिस्सस्सादिच्चबन्धुनो;

हट्ठो हट्ठेन चित्तेन, पदे चित्तं पसादयिं.

६. ‘‘द्वेनवुते इतो कप्पे, यं सञ्ञमलभिं तदा;

दुग्गतिं नाभिजानामि, पदसञ्ञायिदं फलं.

७. ‘‘इतो सत्तमके कप्पे, सुमेधो नाम खत्तियो;

सत्तरतनसम्पन्नो, चक्कवती महब्बलो.

८. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा पदसञ्ञको थेरो इमा गाथायो अभासित्थाति.

पदसञ्ञकत्थेरस्सापदानं दुतियं.

३. बुद्धसञ्ञकत्थेरअपदानं

९. ‘‘दुमग्गे पंसुकूलिकं, लग्गं दिस्वान सत्थुनो;

ततो तमञ्जलिं कत्वा, पंसुकूलं अवन्दहं.

१०. ‘‘द्वेनवुते इतो कप्पे, यं कम्ममकरिं तदा;

दुग्गतिं नाभिजानामि, बुद्धसञ्ञायिदं फलं.

११. ‘‘इतो चतुत्थके कप्पे, दुमसारोसि खत्तियो;

चातुरन्तो विजितावी, चक्कवत्ती महब्बलो.

१२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा बुद्धसञ्ञको थेरो इमा गाथायो अभासित्थाति.

बुद्धसञ्ञकत्थेरस्सापदानं ततियं.

४. भिसालुवदायकत्थेरअपदानं

१३. ‘‘काननं वनमोगय्ह, वसामि विपिने अहं;

विपस्सिं अद्दसं बुद्धं, आहुतीनं पटिग्गहं.

१४. ‘‘भिसालुवञ्च पादासिं, उदकं हत्थधोवनं;

वन्दित्वा सिरसा पादे, पक्कामि उत्तरामुखो.

१५. ‘‘एकनवुतितो कप्पे, भिसालुवमदं तदा;

दुग्गतिं नाभिजानामि, पुञ्ञकम्मस्सिदं फलं.

१६. ‘‘इतो ततियके कप्पे, भिससम्मतखत्तियो;

सत्तरतनसम्पन्नो, चक्कवत्ती महब्बलो.

१७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा भिसालुवदायको थेरो इमा गाथायो अभासित्थाति.

भिसालुवदायकत्थेरस्सापदानं चतुत्थं.

छट्ठभाणवारं.

५. एकसञ्ञकत्थेरअपदानं

१८. ‘‘खण्डो नामासि नामेन, विपस्सिस्सग्गसावको;

एका भिक्खा मया दिन्ना, लोकाहुतिपटिग्गहे.

१९. ‘‘तेन चित्तप्पसादेन, द्विपदिन्द नरासभ;

दुग्गतिं नाभिजानामि, एकभिक्खायिदं फलं.

२०. ‘‘चत्तालीसम्हितो कप्पे, वरुणो नाम खत्तियो;

सत्तरतनसम्पन्नो, चक्कवत्ती महब्बलो.

२१. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा एकसञ्ञको थेरो इमा गाथायो अभासित्थाति.

एकसञ्ञकत्थेरस्सापदानं पञ्चमं.

६. तिणसन्थरदायकत्थेरअपदानं

२२. ‘‘हिमवन्तस्साविदूरे, महाजातस्सरो अहु;

सतपत्तेहि सञ्छन्नो, नानासकुणमालयो.

२३. ‘‘तम्हि न्हत्वा च पित्वा [पीत्वा (सी. स्या.)] च, अविदूरे वसामहं;

अद्दसं समणानग्गं, गच्छन्तं अनिलञ्जसे.

२४. ‘‘मम सङ्कप्पमञ्ञाय, सत्था लोके अनुत्तरो;

अब्भतो ओरुहित्वान, भूमियंठासि तावदे.

२५. ‘‘विसाणेन [लायनेन (स्या.)] तिणं गय्ह, निसीदनमदासहं;

निसीदि भगवा तत्थ, तिस्सो लोकग्गनायको.

२६. ‘‘सकं चित्तं पसादेत्वा, अवन्दि लोकनायकं;

पटिकुटिको [उक्कुटिको (स्या. क.)] अपसक्किं, निज्झायन्तो महामुनिं.

२७. ‘‘तेन चित्तप्पसादेन, निम्मानं उपपज्जहं;

दुग्गतिं नाभिजानामि, सन्थरस्स इदं फलं.

२८. ‘‘इतो दुतियके कप्पे, मिग [मित्त (स्या.)] सम्मतखत्तियो;

सत्तरतनसम्पन्नो, चक्कवत्ती महब्बलो.

२९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा तिणसन्थरदायको थेरो इमा गाथायो अभासित्थाति.

तिणसन्थरदायकत्थेरस्सापदानं छट्ठं.

७. सूचिदायकत्थेरअपदानं

३०. ‘‘तिंसकप्पसहस्सम्हि, सम्बुद्धो लोकनायको;

सुमेधो नाम नामेन, बात्तिंसवरलक्खणो.

३१. ‘‘तस्स कञ्चनवण्णस्स, द्विपदिन्दस्स तादिनो;

पञ्च सूची मया दिन्ना, सिब्बनत्थाय चीवरं.

३२. ‘‘तेनेव सूचिदानेन, निपुणत्थविपस्सकं;

तिक्खं लहुञ्च फासुञ्च, ञाणं मे उदपज्जथ.

३३. ‘‘किलेसा झापिता मय्हं, भवा सब्बे समूहता;

धारेमि अन्तिमं देहं, सम्मासम्बुद्धसासने.

३४. ‘‘द्विपदाधिपती नाम, राजानो चतुरो अहुं;

सत्तरतनसम्पन्ना, चक्कवत्ती महब्बला.

३५. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सूचिदायको थेरो इमा गाथायो अभासित्थाति.

सूचिदायकत्थेरस्सापदानं सत्तमं.

८. पाटलिपुप्फियत्थेरअपदानं

३६. ‘‘सुवण्णवण्णं सम्बुद्धं, गच्छन्तं अन्तरापणे;

कञ्चनग्घियसङ्कासं, बात्तिंसवरलक्खणं.

३७. ‘‘सेट्ठिपुत्तो तदा आसिं, सुखुमालो सुखेधितो;

उच्छङ्गे पाटलिपुप्फं, कत्वान [कत्वा तं (सी. स्या.)] अभिसंहरिं.

३८. ‘‘हट्ठो हट्ठेन चित्तेन, पुप्फेहि अभिपूजयिं;

तिस्सं लोकविदुं नाथं, नरदेवं नमस्सहं.

३९. ‘‘द्वेनवुते इतो कप्पे, यं कम्ममकरिं तदा;

दुग्गतिं नाभिजानामि, पुप्फपूजायिदं फलं.

४०. ‘‘इतो तेसट्ठिकप्पम्हि, अभिसम्मतनामको;

सत्तरतनसम्पन्नो, चक्कवत्ती महब्बलो.

४१. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा पाटलिपुप्फियो थेरो इमा गाथायो अभासित्थाति.

पाटलिपुप्फियत्थेरस्सापदानं अट्ठमं.

९. ठितञ्जलियत्थेरअपदानं

४२. ‘‘मिगलुद्दो पुरे आसिं, अरञ्ञे कानने अहं;

तत्थ अद्दसं [तत्थद्दसासिं (सी. स्या.)] सम्बुद्धं, बात्तिंसवरलक्खणं.

४३. ‘‘तत्थाहं अञ्जलिं कत्वा, पक्कामिं पाचिनामुखो;

अविदूरे निसिन्नस्स, नियके पण्णसन्थरे.

४४. ‘‘ततो मे असनीपातो, मत्थके निपती तदा;

सोहं मरणकालम्हि, अकासिं पुनरञ्जलिं.

४५. ‘‘द्वेनवुते इतो कप्पे, अञ्जलिं अकरिं तदा;

दुग्गतिं नाभिजानामि, अञ्जलिस्स इदं फलं.

४६. ‘‘चतुपण्णासकप्पम्हि, मिगकेतुसनामको;

सत्तरतनसम्पन्नो, चक्कवत्ती महब्बलो.

४७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा ठितञ्जलियो थेरो इमा गाथायो अभासित्थाति.

ठितञ्जलियत्थेरस्सापदानं नवमं.

१०. तिपदुमियत्थेरअपदानं

४८. ‘‘पदुमुत्तरो नाम जिनो, सब्बधम्मान पारगू;

दन्तो दन्तपरिवुतो, नगरा निक्खमी तदा.

४९. ‘‘नगरे हंसवतियं, अहोसिं मालिको तदा;

यं तत्थ उत्तमं तोणि, पद्मपुप्फानि [उत्तमं पुप्फं, तीणि पुप्फानि (सी.)] अग्गहिं.

५०. ‘‘अद्दसं विरजं बुद्धं, पटिमग्गन्तरापणे;

सह [सोहं (सी.)] दिस्वान सम्बुद्धं, एवं चिन्तेसहं तदा.

५१. ‘‘किं मे इमेहि पुप्फेहि, रञ्ञो उपनितेहि मे;

गामं वा गामखेत्तं वा, सहस्सं वा लभेय्यहं.

५२. ‘‘अदन्तदमनं वीरं, सब्बसत्तसुखावहं;

लोकनाथं पूजयित्वा, लच्छामि अमतं धनं.

५३. ‘‘एवाहं चिन्तयित्वान, सकं चित्तं पसादयिं;

तीणि लोहितके गय्ह, आकासे उक्खिपिं तदा.

५४. ‘‘मया उक्खित्तमत्तम्हि, आकासे पत्थरिंसु ते;

धारिंसु मत्थके तत्थ, उद्धंवण्टा अधोमुखा.

५५. ‘‘ये केचि मनुजा दिस्वा, उक्कुट्ठिं सम्पवत्तयुं;

देवता अन्तलिक्खम्हि, साधुकारं पवत्तयुं.

५६. ‘‘अच्छेरं लोके उप्पन्नं, बुद्धसेट्ठस्स वाहसा;

सब्बे धम्मं सुणिस्साम, पुप्फानं वाहसा मयं.

५७. ‘‘पदुमुत्तरो लोकविदू, आहुतीनं पटिग्गहो;

वीथियञ्हि ठितो सन्तो, इमा गाथा अभासथ.

५८. ‘‘‘यो सो बुद्धं अपूजेसि, रत्तपद्मेहि [रत्तपदुमेहि (सी. स्या.)] माणवो;

तमहं कित्तयिस्सामि, सुणाथ मम भासतो.

५९. ‘‘‘तिंसकप्पसहस्सानि, देवलोके रमिस्सति;

तिंसकप्पानि [तिंसक्खत्तुञ्च (स्या.)] देविन्दो, देवरज्जं करिस्सति.

६०. ‘‘‘महावित्थारिकं नाम, ब्यम्हं हेस्सति तावदे;

तियोजनसतुब्बिद्धं, दियड्ढसतवित्थतं.

६१. ‘‘‘चत्तारिसतसहस्सानि, निय्यूहा च सुमापिता;

कूटागारवरूपेता, महासयनमण्डिता.

६२. ‘‘‘कोटिसतसहस्सियो, परिवारेस्सन्ति अच्छरा;

कुसला नच्चगीतस्स, वादितेपि पदक्खिणा.

६३. ‘‘‘एतादिसे ब्यम्हवरे, नारीगणसमाकुले;

वस्सिस्सति पुप्फवस्सो, दिब्बो [पद (क.)] लोहितको सदा.

६४. ‘‘‘भित्तिखीले नागदन्ते, द्वारबाहाय तोरणे;

चक्कमत्ता लोहितका, ओलम्बिस्सन्ति तावदे.