३. सीवलित्थेरअपदानं

५४. ‘‘पदुमुत्तरो नाम जिनो, सब्बधम्मेसु चक्खुमा;

इतो सतसहस्सम्हि, कप्पे उप्पज्जि नायको.

५५. ‘‘सीलं तस्स असङ्खेय्यं, समाधि वजिरूपमो;

असङ्खेय्यं ञाणवरं, विमुत्ति च अनोपमा.

५६. ‘‘मनुजामरनागानं, ब्रह्मानञ्च समागमे;

समणब्राह्मणाकिण्णे, धम्मं देसेसि नायको.

५७. ‘‘ससावकं महालाभिं, पुञ्ञवन्तं जुतिन्धरं;

ठपेसि एतदग्गम्हि, परिसासु विसारदो.

५८. ‘‘तदाहं खत्तियो आसिं, नगरे हंससव्हये;

सुत्वा जिनस्स तं वाक्यं, सावकस्स गुणं बहुं.

५९. ‘‘निमन्तयित्वा सत्ताहं, भोजयित्वा ससावकं;

महादानं ददित्वान, तं ठानमभिपत्थयिं.

६०. ‘‘तदा मं विनतं पादे, दिस्वान पुरिसासभो;

सरेन महता वीरो [सुस्सरेन महावीरो (सी. पी.)], इदं वचनमब्रवि.

६१. ‘‘‘ततो जिनस्स वचनं, सोतुकामा महाजना;

देवदानवगन्धब्बा, ब्रह्मानो च महिद्धिका’.

६२. ‘‘समणब्राह्मणा चेव, नमस्सिंसु कतञ्जली;

‘नमो ते पुरिसाजञ्ञ, नमो ते पुरिसुत्तम.

६३. ‘‘‘खत्तियेन महादानं, दिन्नं सत्ताहिकम्पि वो [सत्तहिकं मि वो (सी.), सत्तहिकाधिकं (स्या.), सत्तहिकं विभो (पी.)];

सोतुकामा फलं तस्स, ब्याकरोहि महामुने’.

६४. ‘‘ततो अवोच भगवा, ‘सुणाथ मम भासितं;

अप्पमेय्यम्हि बुद्धम्हि, ससङ्घम्हि पतिट्ठिता [संघम्हि सुप्पतिट्ठिता (सी. पी.)].

६५. ‘‘‘दक्खिणा ताय [दक्खिणादाय (स्या. पी.)] को वत्ता, अप्पमेय्यफला हि सा;

अपि चे स महाभोगो, ठानं पत्थेति उत्तमं.

६६. ‘‘‘लाभी विपुललाभानं, यथा भिक्खु सुदस्सनो;

तथाहम्पि भवेय्यन्ति, लच्छसे तं अनागते.

६७. ‘‘‘सतसहस्सितो कप्पे, ओक्काककुलसम्भवो;

गोतमो नाम गोत्तेन, सत्था लोके भविस्सति.

६८. ‘‘‘तस्स धम्मेसु दायादो, ओरसो धम्मनिम्मितो;

सीवलि नाम नामेन, हेस्सति सत्थु सावको’.

६९. ‘‘तेन कम्मेन सुकतेन, चेतनापणिधीहि च;

जहित्वा मानुसं देहं, तावतिंसूपगो अहं.

७०. ‘‘एकनवुतितो कप्पे, विपस्सी लोकनायको;

उप्पज्जि चारुदस्सनो, सब्बधम्मविपस्सको.

७१. ‘‘तदाहं बन्धुमतियं, कुलस्सञ्ञतरस्स च;

दयितो पस्सितो चेव, आसिं कम्मन्तवावटो [कम्मन्तब्यावटो (सी. स्या. क.)].

७२. ‘‘तदा अञ्ञतरो पूगो, विपस्सिस्स महेसिनो;

परिवेसं अकारयि, महन्तमतिविस्सुतं.

७३. ‘‘निट्ठिते च महादाने, ददुं खज्जकसञ्हितं;

नवं दधिं मधुञ्चेव, विचिनं नेव अद्दसुं.

७४. ‘‘तदाहं तं गहेत्वान, नवं दधिं मधुम्पि च;

कम्मस्सामिघरं गच्छिं, तमेसन्ता ममद्दसुं.

७५. ‘‘सहस्समपि दत्वान, नालभिंसु च तं द्वयं;

ततोहं एवं चिन्तेसिं, ‘नेतं हेस्सति ओरकं.

७६. ‘‘‘यथा इमे जना सब्बे, सक्करोन्ति तथागतं;

अहम्पि कारं कस्सामि, ससङ्घे लोकनायके’.

७७. ‘‘तदाहमेवं चिन्तेत्वा, दधिं मधुञ्च एकतो;

मद्दित्वा लोकनाथस्स, ससङ्घस्स अदासहं.

७८. ‘‘तेन कम्मेन सुकतेन, चेतनापणिधीहि च;

जहित्वा मानुसं देहं, तावतिंसमगच्छहं.

७९. ‘‘पुनाहं बाराणसियं, राजा हुत्वा महायसो;

सत्तुकस्स तदा दुट्ठो, द्वाररोधमकारयिं.

८०. ‘‘तदा तपस्सिनो रुद्धा, एकाहं रक्खिता अहुं;

ततो तस्स विपाकेन, पापतिं [पापिट्ठं (स्या.) पापत्तं (क.)] निरयं भुसं.

८१. ‘‘पच्छिमे च भवे दानि, जातोहं कोलिये पुरे;

सुप्पवासा च मे माता, महालि लिच्छवी पिता.

८२. ‘‘खत्तिये पुञ्ञकम्मेन, द्वाररोधस्स वाहसा;

सत्त वस्सानि निवसिं, मातुकुच्छिम्हि दुक्खितो.

८३. ‘‘सत्ताहं द्वारमूळ्होहं, महादुक्खसमप्पितो;

माता मे छन्ददानेन, एवं आसि सुदुक्खिता.

८४. ‘‘सुवत्थितोहं निक्खन्तो, बुद्धेन अनुकम्पितो;

निक्खन्तदिवसेयेव, पब्बजिं अनगारियं.

८५. ‘‘उपज्झा सारिपुत्तो मे, मोग्गल्लानो महिद्धिको;

केसे ओरोपयन्तो मे, अनुसासि महामति.

८६. ‘‘केसेसु छिज्जमानेसु, अरहत्तमपापुणिं;

देवा नागा मनुस्सा च, पच्चये उपनेन्ति मे.

८७. ‘‘पदुमुत्तरनाथञ्च, विपस्सिञ्च विनायकं;

यं पूजयिं पमुदितो, पच्चयेहि विसेसतो.

८८. ‘‘ततो तेसं विसेसेन, कम्मानं विपुलुत्तमं;

लाभं लभामि सब्बत्थ, वने गामे जले थले.

८९. ‘‘रेवतं दस्सनत्थाय, यदा याति विनायको;

तिंसभिक्खुसहस्सेहि, सह लोकग्गनायको.

९०. ‘‘तदा देवोपणीतेहि, ममत्थाय महामति;

पच्चयेहि महावीरो, ससङ्घो लोकनायको.

९१. ‘‘उपट्ठितो मया बुद्धो, गन्त्वा रेवतमद्दस;

ततो जेतवनं गन्त्वा, एतदग्गे ठपेसि मं.

९२. ‘‘‘लाभीनं सीवलि अग्गो, मम सिस्सेसु भिक्खवो’;

सब्बलोकहितो सत्था, कित्तयी परिसासु मं.

९३. ‘‘किलेसा झापिता मय्हं…पे… विहरामि अनासवो.

९४. ‘‘स्वागतं वत मे आसि…पे… कतं बुद्धस्स सासनं.

९५. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सीवलिथेरो इमा गाथायो

अभासित्थाति.

सीवलित्थेरस्सापदानं ततियं.