१०. सुगन्धत्थेरअपदानं

८१. ‘‘इमम्हि भद्दके कप्पे, ब्रह्मबन्धु महायसो;

कस्सपो नाम गोत्तेन [नामेन (सब्बत्थ)], उप्पज्जि वदतं वरो.

८२. ‘‘अनुब्यञ्जनसम्पन्नो, बात्तिंसवरलक्खणो;

ब्यामप्पभापरिवुतो, रंसिजालसमोत्थटो [रंसिजालसमोसटो (सी. पी.)].

८३. ‘‘अस्सासेता यथा चन्दो, सूरियोव पभङ्करो;

निब्बापेता यथा मेघो, सागरोव गुणाकरो.

८४. ‘‘धरणीरिव सीलेन, हिमवाव समाधिना;

आकासो विय पञ्ञाय, असङ्गो अनिलो यथा.

८५. ‘‘स कदाचि महावीरो, परिसासु विसारदो;

सच्चानि सम्पकासेति, उद्धरन्तो महाजनं.

८६. ‘‘तदा हि बाराणसियं, सेट्ठिपुत्तो महायसो;

आसहं धनधञ्ञस्स [अनन्तधनधञ्ञस्स (क.)], पहूतस्स बहू तदा.

८७. ‘‘जङ्घाविहारं विचरं, मिगदायमुपेच्चहं [मुपेसहं (क.)];

अद्दसं विरजं बुद्धं, देसेन्तं अमतं पदं.

८८. ‘‘विसट्ठकन्तवचनं, करवीकसमस्सरं;

हंसरुतेहि [हंसदुन्दुभि (स्या. पी.)] निग्घोसं, विञ्ञापेन्तं महाजनं.

८९. ‘‘दिस्वा देवातिदेवं तं, सुत्वाव मधुरं गिरं;

पहायनप्पके भोगे, पब्बजिं अनगारियं.

९०. ‘‘एवं पब्बजितो चाहं, न चिरेन बहुस्सुतो;

अहोसिं धम्मकथिको, विचित्तपटिभाणवा.

९१. ‘‘महापरिसमज्झेहं, हट्ठचित्तो पुनप्पुनं;

वण्णयिं हेमवण्णस्स, वण्णं वण्णविसारदो.

९२. ‘‘एस खीणासवो बुद्धो, अनीघो छिन्नसंसयो;

सब्बकम्मक्खयं पत्तो, विमुत्तोपधिसङ्खये.

९३. ‘‘एस सो भगवा बुद्धो, एस सीहो अनुत्तरो;

सदेवकस्स लोकस्स, ब्रह्मचक्कप्पवत्तको.

९४. ‘‘दन्तो दमेता सन्तो च, समेता निब्बुतो इसि;

निब्बापेता च अस्सत्थो, अस्सासेता महाजनं.

९५. ‘‘वीरो सूरो च विक्कन्तो [धीरो च (सी. पी.)], पञ्ञो कारुणिको वसी;

विजितावी च स जिनो, अप्पगब्बो अनालयो.

९६. ‘‘अनेञ्जो अचलो धीमा, अमोहो असमो मुनि;

धोरय्हो उसभो नागो, सीहो सक्को गरूसुपि.

९७. ‘‘विरागो विमलो ब्रह्मा, वादी सूरो रणञ्जहो;

अखिलो च विसल्लो च, असमो संयतो [वुसभो (स्या.), पयतो (पी.)] सुचि.

९८. ‘‘ब्राह्मणो समणो नाथो, भिसक्को सल्लकत्तको;

योधो बुद्धो सुतासुतो [सुतो सुतो (सी. पी.)], अचलो मुदितो सितो [दितो (सी.)].

९९. ‘‘धाता धता च सन्ति च, कत्ता नेता पकासिता;

सम्पहंसिता भेत्ता च, छेत्ता सोता पसंसिता.

१००. ‘‘अखिलो च विसल्लो च, अनीघो अकथंकथी;

अनेजो विरजो कत्ता, गन्धा वत्ता पसंसिता.

१०१. ‘‘तारेता अत्थकारेता, कारेता सम्पदारिता;

पापेता सहिता कन्ता, हन्ता आतापी तापसो [हन्ता, तापिता च विसोसिता (स्या.)].

१०२. ‘‘समचित्तो [सच्चट्ठितो (स्या.)] समसमो, असहायो दयालयो [दयासयो (सी.)];

अच्छेरसत्तो [अच्छेरमन्तो (स्या.)] अकुहो, कतावी इसिसत्तमो.

१०३. ‘‘नित्तिण्णकङ्खो निम्मानो, अप्पमेय्यो अनूपमो;

सब्बवाक्यपथातीतो, सच्च नेय्यन्तगू [सब्बनेय्यन्तिको (स्या.)] जिनो.

१०४. ‘‘सत्तसारवरे [सतरंसीवरे (स्या.)] तस्मिं, पसादो अमतावहो;

तस्मा बुद्धे च धम्मे च, सङ्घे सद्धा महत्थिका [महिद्धिका (सी. क.)].

१०५. ‘‘गुणेहि एवमादीहि, तिलोकसरणुत्तमं;

वण्णेन्तो परिसामज्झे, अकं [कथिं (स्या.)] धम्मकथं अहं.

१०६. ‘‘ततो चुताहं तुसिते, अनुभोत्वा महासुखं;

ततो चुतो मनुस्सेसु, जातो होमि सुगन्धिको.

१०७. ‘‘निस्सासो मुखगन्धो च, देहगन्धो तथेव मे;

सेदगन्धो च सततं, सब्बगन्धोव होति मे [सब्बगन्धोतिसेति मे (सी. पी.)].

१०८. ‘‘मुखगन्धो सदा मय्हं, पदुमुप्पलचम्पको;

परिसन्तो [आदिसन्तो (सी.), अतिकन्तो (स्या.), अतिसन्तो (पी.)] सदा वाति, सरीरो च तथेव मे.

१०९. ‘‘गुणत्थवस्स सब्बन्तं, फलं तु [फलन्तं (स्या.)] परमब्भुतं;

एकग्गमनसा सब्बे, वण्णयिस्सं [भासितस्स (स्या.)] सुणाथ मे.

११०. ‘‘गुणं बुद्धस्स वत्वान, हिताय च न सदिसं [हिताय जनसन्धिसु (सी. पी.), हिताय नं सुखावहं (स्या.)];

सुखितो [सुचित्तो (स्या.)] होमि सब्बत्थ, सङ्घो वीरसमायुतो [सरद्धनिसमायुतो (सी.)].

१११. ‘‘यसस्सी सुखितो कन्तो, जुतिमा पियदस्सनो;

वत्ता अपरिभूतो च, निद्दोसो पञ्ञवा तथा.

११२. ‘‘खीणे आयुसि [पासुसि (स्या.)] निब्बानं, सुलभं बुद्धभत्तिनो;

तेसं हेतुं पवक्खामि, तं सुणाथ यथातथं.

११३. ‘‘सन्तं यसं भगवतो, विधिना अभिवादयं;

तत्थ तत्थूपपन्नोपि [यत्थ तत्थूपपन्नोपि (सी. पी.)], यसस्सी तेन होमहं.

११४. ‘‘दुक्खस्सन्तकरं बुद्धं, धम्मं सन्तमसङ्खतं;

वण्णयं सुखदो आसिं, सत्तानं सुखितो ततो.

११५. ‘‘गुणं वदन्तो बुद्धस्स, बुद्धपीतिसमायुतो;

सकन्तिं परकन्तिञ्च, जनयिं तेन कन्तिमा.

११६. ‘‘जिनो ते तित्थिकाकिण्णे [जनोघे तित्थकाकिण्णे (सी. पी.), जिनो यो तित्थिकातिण्णो (स्या.)], अभिभुय्य कुतित्थिये;

गुणं वदन्तो जोतेसिं [थोमेसिं (स्या.)], नायकं जुतिमा ततो.

११७. ‘‘पियकारी जनस्सापि, सम्बुद्धस्स गुणं वदं;

सरदोव ससङ्कोहं, तेनासिं पियदस्सनो.

११८. ‘‘यथासत्तिवसेनाहं, सब्बवाचाहि सन्थविं;

सुगतं तेन वागिसो, विचित्तपटिभानवा.

११९. ‘‘ये बाला विमतिं पत्ता, परिभोन्ति महामुनिं;

निग्गहिं ते सद्धम्मेन, परिभूतो न तेनहं [परिभूतेन तेनहं (स्या.)].

१२०. ‘‘बुद्धवण्णेन सत्तानं, किलेसे अपनेसहं;

निक्किलेसमनो होमि, तस्स कम्मस्स वाहसा.

१२१. ‘‘सोतूनं वुद्धिमजनिं [बुद्धिमजनिं (सी. पी.)], बुद्धानुस्सतिदेसको;

तेनाहमासिं [तेनापि चासिं (स्या.)] सप्पञ्ञो, निपुणत्थविपस्सको.

१२२. ‘‘सब्बासवपरिक्खीणो, तिण्णसंसारसागरो;

सिखीव अनुपादानो, पापुणिस्सामि निब्बुतिं.

१२३. ‘‘इमस्मिंयेव कप्पस्मिं, यमहं सन्थविं जिनं;

दुग्गतिं नाभिजानामि, बुद्धवण्णस्सिदं फलं.

१२४. ‘‘किलेसा झापिता मय्हं…पे… विहरामि अनासवो.

१२५. ‘‘स्वागतं वत मे आसि…पे… कतं बुद्धस्स सासनं.

१२६. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सुगन्धो थेरो इमा गाथायो

अभासित्थाति.

सुगन्धत्थेरस्सापदानं दसमं.

तिणदायकवग्गो तेपञ्ञासमो.