७. लसुणदायकत्थेरअपदानं

८९. ‘‘हिमवन्तस्साविदूरे, तापसो आसहं तदा;

लसुणं उपजीवामि, लसुणं मय्हभोजनं.

९०. ‘‘खारियो पूरयित्वान, सङ्घाराममगच्छहं;

हट्ठो हट्ठेन चित्तेन, सङ्घस्स लसुणं अदं.

९१. ‘‘विपस्सिस्स नरग्गस्स, सासने निरतस्सहं;

सङ्घस्स लसुणं दत्वा, कप्पं सग्गम्हि मोदहं.

९२. ‘‘एकनवुतितो कप्पे, लसुणं यमदं तदा;

दुग्गतिं नाभिजानामि, लसुणस्स इदं फलं.

९३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा लसुणदायको थेरो इमा गाथायो अभासित्थाति;

लसुणदायकत्थेरस्सापदानं सत्तमं.