९. तिमिरपुप्फियत्थेरअपदानं

३१. ‘‘चन्दभागानदीतीरे, अनुसोतं वजामहं;

अद्दसं विरजं बुद्धं, सालराजंव फुल्लितं.

३२. ‘‘पसन्नचित्तो सुमनो, पच्चेकमुनिमुत्तमं;

गहेत्वा तिमिरं पुप्फं, मत्थके ओकिरिं अहं.

३३. ‘‘एकनवुतितो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

३४. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा तिमिरपुप्फियो थेरो इमा गाथायो अभासित्थाति.

तिमिरपुप्फियत्थेरस्सापदानं नवमं.