१०. सळलपुप्फियत्थेरअपदानं

३५. ‘‘चन्दभागानदीतीरे, अहोसिं किन्नरो तदा;

तत्थद्दसं देवदेवं, चङ्कमन्तं नरासभं.

३६. ‘‘ओचिनित्वान सळलं, पुप्फं बुद्धस्सदासहं;

उपसिङ्घि महावीरो, सळलं देवगन्धिकं.

३७. ‘‘पटिग्गहेत्वा सम्बुद्धो, विपस्सी लोकनायको;

उपसिङ्घि महावीरो, पेक्खमानस्स मे सतो.

३८. ‘‘पसन्नचित्तो सुमनो, वन्दित्वा द्विपदुत्तमं;

अञ्जलिं पग्गहेत्वान, पुन पब्बतमारुहिं.

३९. ‘‘एकनवुतितो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

४०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सळलपुप्फियो थेरो इमा गाथायो अभासित्थाति.

सळलपुप्फियत्थेरस्सापदानं दसमं.

मन्दारवपुप्फियवग्गो सत्ततिंसतिमो.