३७. मन्दारवपुप्फियवग्गो

१. मन्दारवपुप्फियत्थेरअपदानं

१. ‘‘तावतिंसा इधागन्त्वा, मङ्गलो नाम माणवो;

मन्दारवं गहेत्वान, विपस्सिस्स महेसिनो.

२. ‘‘समाधिना निसिन्नस्स, मत्थके धारयिं अहं;

सत्ताहं धारयित्वान, देवलोकं पुनागमिं.

३. ‘‘एकनवुतितो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

४. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा मन्दारवपुप्फियो थेरो इमा गाथायो अभासित्थाति.

मन्दारवपुप्फियत्थेरस्सापदानं पठमं.

२. कक्कारुपुप्फियत्थेरअपदानं

५. ‘‘यामा देवा इधागन्त्वा, गोतमं सिरिवच्छसं;

कक्कारुमालं [गोक्खनुमालं (सी.)] पग्गय्ह, बुद्धस्स अभिरोपयिं.

६. ‘‘द्वेनवुते इतो कप्पे, यं बुद्धमभिपूजयिं;

दुग्गतिं नाभिजानामि, बुद्धपूजायिदं फलं.

७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा कक्कारुपुप्फियो [गोक्खनुपुप्फियो (क.)] थेरो इमा गाथायो अभासित्थाति.

कक्कारुपुप्फियत्थेरस्सापदानं दुतियं.

३. भिसमुळालदायकत्थेरअपदानं

८. ‘‘फुस्सो नामासि सम्बुद्धो, सब्बधम्मान पारगू;

विवेककामो सब्बञ्ञू [सप्पञ्ञो (सी. स्या.)], आगञ्छि मम सन्तिके.

९. ‘‘तस्मिं चित्तं पसादेत्वा, महाकारुणिके जिने;

भिसमुळालं पग्गय्ह, बुद्धसेट्ठस्सदासहं.

१०. ‘‘द्वेनवुते इतो कप्पे, यं भिसमददिं तदा;

दुग्गतिं नाभिजानामि, भिसदानस्सिदं फलं.

११. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा भिसमुळालदायको थेरो इमा गाथायो अभासित्थाति.

भिसमुळालदायकत्थेरस्सापदानं ततियं.

४. केसरपुप्फियत्थेरअपदानं

१२. ‘‘विज्जाधरो तदा आसिं, हिमवन्तम्हि पब्बते;

अद्दसं विरजं बुद्धं, चङ्कमन्तं महायसं.

१३. ‘‘तीणि केसरपुप्फानि [केसरिपुप्फानि (सी.)], सीसे कत्वानहं तदा;

उपसङ्कम्म सम्बुद्धं, वेस्सभुं अभिपूजयिं.

१४. ‘‘एकत्तिंसे इतो कप्पे, यं कम्ममकरिं तदा;

दुग्गतिं नाभिजानामि, बुद्धपूजायिदं फलं.

१५. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा केसरपुप्फियो थेरो इमा गाथायो अभासित्थाति.

केसरपुप्फियत्थेरस्सापदानं चतुत्थं.

५. अङ्कोलपुप्फियत्थेरअपदानं

१६. ‘‘पदुमो नाम सम्बुद्धो, चित्तकूटे वसी तदा;

दिस्वान तं अहं बुद्धं, सयम्भुं अपराजितं [उपगच्छिहं (सी. स्या.)].

१७. ‘‘अङ्कोलं पुप्फितं दिस्वा, ओचिनित्वानहं तदा;

उपगन्त्वान सम्बुद्धं, पूजयिं पदुमं जिनं.

१८. ‘‘एकत्तिंसे इतो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

१९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा अङ्कोलपुप्फियो थेरो इमा गाथायो अभासित्थाति.

अङ्कोलपुप्फियत्थेरस्सापदानं पञ्चमं.

६. कदम्बपुप्फियत्थेरअपदानं

२०. ‘‘सुवण्णवण्णं सम्बुद्धं, गच्छन्तं अन्तरापणे;

कञ्चनग्घियसङ्कासं, बात्तिंसवरलक्खणं.

२१. ‘‘निसज्ज पासादवरे, अद्दसं लोकनायकं;

कदम्बपुप्फं पग्गय्ह, विपस्सिं अभिपूजयिं.

२२. ‘‘एकनवुतितो कप्पे, यं बुद्धमभिपूजयिं;

दुग्गतिं नाभिजानामि, बुद्धपूजायिदं फलं.

२३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा कदम्बपुप्फियो थेरो इमा गाथायो अभासित्थाति.

कदम्बपुप्फियत्थेरस्सापदानं छट्ठं.

७. उद्दालकपुप्फियत्थेरअपदानं

२४. ‘‘अनोमो [सुजातो (स्या.), अनुमो (क.)] नाम सम्बुद्धो, गङ्गाकूले वसी तदा;

उद्दालकं गहेत्वान, पूजयिं अपराजितं.

२५. ‘‘एकत्तिंसे इतो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

२६. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा उद्दालकपुप्फियो थेरो इमा गाथायो अभासित्थाति.

उद्दालकपुप्फियत्थेरस्सापदानं सत्तमं.

८. एकचम्पकपुप्फियत्थेरअपदानं

२७. ‘‘उपसन्तो च सम्बुद्धो, वसती पब्बतन्तरे;

एकचम्पकमादाय, उपगच्छिं नरुत्तमं.

२८. ‘‘पसन्नचित्तो सुमनो, पच्चेकमुनिमुत्तमं;

उभोहत्थेहि पग्गय्ह, पूजयिं अपराजितं.

२९. ‘‘पञ्चसट्ठिम्हितो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

३०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा एकचम्पकपुप्फियो थेरो इमा गाथायो अभासित्थाति.

एकचम्पकपुप्फियत्थेरस्सापदानं अट्ठमं.

९. तिमिरपुप्फियत्थेरअपदानं

३१. ‘‘चन्दभागानदीतीरे, अनुसोतं वजामहं;

अद्दसं विरजं बुद्धं, सालराजंव फुल्लितं.

३२. ‘‘पसन्नचित्तो सुमनो, पच्चेकमुनिमुत्तमं;

गहेत्वा तिमिरं पुप्फं, मत्थके ओकिरिं अहं.

३३. ‘‘एकनवुतितो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

३४. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा तिमिरपुप्फियो थेरो इमा गाथायो अभासित्थाति.

तिमिरपुप्फियत्थेरस्सापदानं नवमं.

१०. सळलपुप्फियत्थेरअपदानं

३५. ‘‘चन्दभागानदीतीरे, अहोसिं किन्नरो तदा;

तत्थद्दसं देवदेवं, चङ्कमन्तं नरासभं.

३६. ‘‘ओचिनित्वान सळलं, पुप्फं बुद्धस्सदासहं;

उपसिङ्घि महावीरो, सळलं देवगन्धिकं.

३७. ‘‘पटिग्गहेत्वा सम्बुद्धो, विपस्सी लोकनायको;

उपसिङ्घि महावीरो, पेक्खमानस्स मे सतो.

३८. ‘‘पसन्नचित्तो सुमनो, वन्दित्वा द्विपदुत्तमं;

अञ्जलिं पग्गहेत्वान, पुन पब्बतमारुहिं.

३९. ‘‘एकनवुतितो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

४०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सळलपुप्फियो थेरो इमा गाथायो अभासित्थाति.

सळलपुप्फियत्थेरस्सापदानं दसमं.

मन्दारवपुप्फियवग्गो सत्ततिंसतिमो.