८. एकचम्पकपुप्फियत्थेरअपदानं

२७. ‘‘उपसन्तो च सम्बुद्धो, वसती पब्बतन्तरे;

एकचम्पकमादाय, उपगच्छिं नरुत्तमं.

२८. ‘‘पसन्नचित्तो सुमनो, पच्चेकमुनिमुत्तमं;

उभोहत्थेहि पग्गय्ह, पूजयिं अपराजितं.

२९. ‘‘पञ्चसट्ठिम्हितो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

३०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा एकचम्पकपुप्फियो थेरो इमा गाथायो अभासित्थाति.

एकचम्पकपुप्फियत्थेरस्सापदानं अट्ठमं.