५. दण्डदायकत्थेरअपदानं

१८. ‘‘काननं वनमोगय्ह, वेळुं छेत्वानहं तदा;

आलम्बनं करित्वान, सङ्घस्स अददं अहं.

१९. ‘‘तेन चित्तप्पसादेन, सुब्बते अभिवादिय;

आलम्बनम्पि दत्वान, पक्कामिं उत्तरामुखो.

२०. ‘‘चतुन्नवुतितो कप्पे, यं दण्डमददिं तदा;

दुग्गतिं नाभिजानामि, दण्डदानस्सिदं फलं.

२१. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा दण्डदायको थेरो इमा गाथायो अभासित्थाति.

दण्डदायकत्थेरस्सापदानं पञ्चमं.