३६. सद्दसञ्ञकवग्गो

१. सद्दसञ्ञकत्थेरअपदानं

१. ‘‘मिगलुद्दो पुरे आसिं, अरञ्ञे कानने अहं;

तत्थद्दसासिं सम्बुद्धं, देवसङ्घपुरक्खतं.

२. ‘‘चतुसच्चं पकासेन्तं, उद्धरन्तं महाजनं;

अस्सोसिं मधुरं वाचं, करवीकरुदोपमं [रुतोपमं (?)].

३. ‘‘ब्रह्मसरस्स मुनिनो, सिखिनो लोकबन्धुनो;

घोसे चित्तं पसादेत्वा, पत्तोम्हि आसवक्खयं.

४. ‘‘एकत्तिंसे इतो कप्पे, यं कम्ममकरिं तदा;

दुग्गतिं नाभिजानामि, पसादस्स इदं फलं.

५. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा सद्दसञ्ञको थेरो इमा गाथायो अभासित्थाति.

सद्दसञ्ञकत्थेरस्सापदानं पठमं.

२. यवकलापियत्थेरअपदानं

६. ‘‘नगरे अरुणवतिया, आसिं यवसिको तदा;

पन्थे दिस्वान सम्बुद्धं, यवकलापं सन्थरिं [यवकलापमवत्थरिं (सी.)].

७. ‘‘अनुकम्पको कारुणिको, सिखी लोकग्गनायको;

मम सङ्कप्पमञ्ञाय, निसीदि यवसन्थरे.

८. ‘‘दिस्वा निसिन्नं विमलं, महाझायिं विनायकं;

पामोज्जं जनयित्वान, तत्थ कालङ्कतो अहं.

९. ‘‘एकत्तिंसे इतो कप्पे, यं कम्ममकरिं तदा;

दुग्गतिं नाभिजानामि, यवत्थरे इदं फलं.

१०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा यवकलापियो थेरो इमा गाथायो अभासित्थाति.

यवकलापियत्थेरस्सापदानं दुतियं.

३. किंसुकपूजकत्थेरअपदानं

११. ‘‘किंसुकं पुप्फितं दिस्वा, पग्गहेत्वान अञ्जलिं;

बुद्धं सरित्वा सिद्धत्थं, आकासे अभिपूजयिं.

१२. ‘‘चतुन्नवुतितो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

१३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा किंसुकपूजको थेरो इमा गाथायो अभासित्थाति.

किंसुकपूजकत्थेरस्सापदानं ततियं.

४. सकोसककोरण्डदायकत्थेरअपदानं

१४. ‘‘अक्कन्तञ्च पदं दिस्वा, सिखिनो लोकबन्धुनो;

एकंसं अजिनं कत्वा, पदसेट्ठं अवन्दहं.

१५. ‘‘कोरण्डं पुप्फितं दिस्वा, पादपं धरणीरुहं;

सकोसकं [सकोटकं (सी. स्या.)] गहेत्वान, पदचक्कं अपूजयिं.

१६. ‘‘एकत्तिंसे इतो कप्पे, यं कम्ममकरिं तदा;

दुग्गतिं नाभिजानामि, पदपूजायिदं फलं.

१७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सकोसक [सकोटक (सी. स्या.)] कोरण्डदायको थेरो इमा गाथायो अभासित्थाति.

सकोसककोरण्डदायकत्थेरस्सापदानं चतुत्थं.

५. दण्डदायकत्थेरअपदानं

१८. ‘‘काननं वनमोगय्ह, वेळुं छेत्वानहं तदा;

आलम्बनं करित्वान, सङ्घस्स अददं अहं.

१९. ‘‘तेन चित्तप्पसादेन, सुब्बते अभिवादिय;

आलम्बनम्पि दत्वान, पक्कामिं उत्तरामुखो.

२०. ‘‘चतुन्नवुतितो कप्पे, यं दण्डमददिं तदा;

दुग्गतिं नाभिजानामि, दण्डदानस्सिदं फलं.

२१. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा दण्डदायको थेरो इमा गाथायो अभासित्थाति.

दण्डदायकत्थेरस्सापदानं पञ्चमं.

६. अम्बयागुदायकत्थेरअपदानं

२२. ‘‘सतरंसी नाम सम्बुद्धो, सयम्भू अपराजितो;

वुट्ठहित्वा समाधिम्हा, भिक्खाय ममुपागमि.

२३. ‘‘पच्चेकबुद्धं दिस्वान, अम्बयागुं अदासहं;

विप्पसन्नमनं तस्स, विप्पसन्नेन चेतसा.

२४. ‘‘चतुन्नवुतितो कप्पे, यं कम्ममकरिं तदा;

दुग्गतिं नाभिजानामि, अम्बयागुयिदं फलं.

२५. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा अम्बयागुदायको थेरो इमा गाथायो अभासित्थाति.

अम्बयागुदायकत्थेरस्सापदानं छट्ठं.

७. सुपुटकपूजकत्थेरअपदानं

२६. ‘‘दिवाविहारा निक्खन्तो, विपस्सी लोकनायको;

भिक्खाय विचरन्तो सो, मम सन्तिकुपागमि.

२७. ‘‘ततो पतीतो सुमनो, बुद्धसेट्ठस्स तादिनो;

लोणसुपुटकं दत्वा, कप्पं सग्गम्हि मोदहं.

२८. ‘‘एकनवुतितो कप्पे, यं पुटकमदासहं;

दुग्गतिं नाभिजानामि, पुटकस्स इदं फलं.

२९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सुपुटकपूजको थेरो इमा गाथायो अभासित्थाति.

सुपुटकपूजकत्थेरस्सापदानं सत्तमं.

८. मञ्चदायकत्थेरअपदानं

३०. ‘‘विपस्सिनो भगवतो, लोकजेट्ठस्स तादिनो;

एकं मञ्चं मया दिन्नं, पसन्नेन सपाणिना.

३१. ‘‘हत्थियानं अस्सयानं, दिब्बयानं समज्झगं;

तेन मञ्चकदानेन, पत्तोम्हि आसवक्खयं.

३२. ‘‘एकनवुतितो कप्पे, यं मञ्चमददिं तदा;

दुग्गतिं नाभिजानामि, मञ्चदानस्सिदं फलं.

३३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा मञ्चदायको थेरो इमा गाथायो अभासित्थाति.

मञ्चदायकत्थेरस्सापदानं अट्ठमं.

९. सरणगमनियत्थेरअपदानं

३४. ‘‘आरुहिम्ह तदा नावं, भिक्खु चाजीवको चहं;

नावाय भिज्जमानाय, भिक्खु मे सरणं अदा.

३५. ‘‘एकत्तिंसे इतो कप्पे, यञ्च मे सरणं अदा;

दुग्गतिं नाभिजानामि, सरणागमने फलं.

३६. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सरणगमनियो थेरो इमा गाथायो अभासित्थाति.

सरणगमनियत्थेरस्सापदानं नवमं.

१०. पिण्डपातिकत्थेरअपदानं

३७. ‘‘तिस्सो नामासि सम्बुद्धो, विहासि विपिने तदा;

तुसिता हि इधागन्त्वा, पिण्डपातं अदासहं.

३८. ‘‘सम्बुद्धमभिवादेत्वा, तिस्सं नाम महायसं;

सकं चित्तं पसादेत्वा, तुसितं अगमासहं.

३९. ‘‘द्वेनवुते इतो कप्पे, यं दानमददिं तदा;

दुग्गतिं नाभिजानामि, पिण्डपातस्सिदं फलं.

४०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा पिण्डपातिको थेरो इमा गाथायो अभासित्थाति.

पिण्डपातिकत्थेरस्सापदानं दसमं.

सद्दसञ्ञकवग्गो छत्तिंसतिमो.