१०. पिण्डपातिकत्थेरअपदानं

३७. ‘‘तिस्सो नामासि सम्बुद्धो, विहासि विपिने तदा;

तुसिता हि इधागन्त्वा, पिण्डपातं अदासहं.

३८. ‘‘सम्बुद्धमभिवादेत्वा, तिस्सं नाम महायसं;

सकं चित्तं पसादेत्वा, तुसितं अगमासहं.

३९. ‘‘द्वेनवुते इतो कप्पे, यं दानमददिं तदा;

दुग्गतिं नाभिजानामि, पिण्डपातस्सिदं फलं.

४०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा पिण्डपातिको थेरो इमा गाथायो अभासित्थाति.

पिण्डपातिकत्थेरस्सापदानं दसमं.

सद्दसञ्ञकवग्गो छत्तिंसतिमो.