८. उत्तरेय्यदायकत्थेरअपदानं

९०. ‘‘नगरे हंसवतिया, अहोसिं ब्राह्मणो तदा;

अज्झायको मन्तधरो, तिण्णं वेदान पारगू.

९१. ‘‘पुरक्खतो ससिस्सेहि, जातिमा च सुसिक्खितो;

तोयाभिसेचनत्थाय, नगरा निक्खमिं तदा.

९२. ‘‘पदुमुत्तरो नाम जिनो, सब्बधम्मान पारगू;

खीणासवसहस्सेहि, पाविसी नगरं जिनो.

९३. ‘‘सुचारुरूपं दिस्वान, आनेञ्जकारितं विय;

परिवुतं अरहन्तेहि, दिस्वा चित्तं पसादयिं.

९४. ‘‘सिरस्मिं अञ्जलिं कत्वा, नमस्सित्वान सुब्बतं;

पसन्नचित्तो सुमनो, उत्तरीयमदासहं.

९५. ‘‘उभो हत्थेहि पग्गय्ह, साटकं उक्खिपिं अहं;

यावता बुद्धपरिसा, ताव छादेसि साटको.

९६. ‘‘पिण्डचारं चरन्तस्स, महाभिक्खुगणादिनो;

छदं करोन्तो अट्ठासि, हासयन्तो ममं तदा.

९७. ‘‘घरतो निक्खमन्तस्स, सयम्भू अग्गपुग्गलो;

वीथियंव ठितो सत्था, अका मे [अकासि (स्या.)] अनुमोदनं.

९८. ‘‘पसन्नचित्तो सुमनो, यो मे अदासि साटकं;

तमहं कित्तयिस्सामि, सुणोथ मम भासतो.

९९. ‘‘‘तिंसकप्पसहस्सानि, देवलोके रमिस्सति;

पञ्ञासक्खत्तुं देविन्दो, देवरज्जं करिस्सति.

१००. ‘‘‘देवलोके वसन्तस्स, पुञ्ञकम्मसमङ्गिनो;

समन्ता योजनसतं, दुस्सच्छन्नं भविस्सति.

१०१. ‘‘‘छत्तिंसक्खत्तुं राजा च, चक्कवत्ती भविस्सति;

पदेसरज्जं विपुलं, गणनातो असङ्खियं.

१०२. ‘‘‘भवे संसरमानस्स, पुञ्ञकम्मसमङ्गिनो;

मनसा पत्थितं सब्बं, निब्बत्तिस्सति तावदे.

१०३. ‘‘‘कोसेय्यकम्बलियानि [कोसेय्यकम्बलीयानि (सी.)], खोमकप्पासिकानि च;

महग्घानि च दुस्सानि, पटिलच्छतियं नरो.

१०४. ‘‘‘मनसा पत्थितं सब्बं, पटिलच्छतियं नरो;

एकदुस्सस्स विपाकं, अनुभोस्सति सब्बदा.

१०५. ‘‘‘सो पच्छा पब्बजित्वान, सुक्कमूलेन चोदितो;

गोतमस्स भगवतो, धम्मं सच्छिकरिस्सति’.

१०६. ‘‘अहो मे सुकतं कम्मं, सब्बञ्ञुस्स महेसिनो;

एकाहं साटकं दत्वा, पत्तोम्हि अमतं पदं.

१०७. ‘‘मण्डपे रुक्खमूले वा, वसतो सुञ्ञके घरे;

धारेति दुस्सछदनं, समन्ता ब्यामतो मम.

१०८. ‘‘अविञ्ञत्तं निवासेमि [अविञ्ञत्तानि सेवामि (?)], चीवरं पच्चयञ्चहं;

लाभी [लाभिम्हि (स्या.)] अन्नस्स पानस्स, उत्तरेय्यस्सिदं फलं.

१०९. ‘‘सतसहस्सितो कप्पे, यं कम्ममकरिं तदा;

दुग्गतिं नाभिजानामि, वत्थदानस्सिदं फलं.

११०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा उत्तरेय्यदायको थेरो इमा गाथायो अभासित्थाति.

उत्तरेय्यदायकत्थेरस्सापदानं अट्ठमं.