३४. गन्धोदकवग्गो

१. गन्धधूपियत्थेरअपदानं

१. ‘‘सिद्धत्थस्स भगवतो, गन्धधूपं अदासहं;

सुमनेहि पटिच्छन्नं, बुद्धानुच्छविकञ्च तं.

२. ‘‘कञ्चनग्घियसङ्कासं, बुद्धं लोकग्गनायकं;

इन्दीवरंव जलितं, आदित्तंव हुतासनं.

३. ‘‘ब्यग्घुसभंव पवरं, अभिजातंव केसरिं;

निसिन्नं समणानग्गं, भिक्खुसङ्घपुरक्खतं.

४. ‘‘दिस्वा चित्तं पसादेत्वा, पग्गहेत्वान अञ्जलिं;

वन्दित्वा सत्थुनो पादे, पक्कामिं उत्तरामुखो.

५. ‘‘चतुन्नवुतितो कप्पे, यं गन्धमददिं तदा;

दुग्गतिं नाभिजानामि, गन्धपूजायिदं फलं.

६. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा गन्धधूपियो थेरो इमा गाथायो अभासित्थाति.

गन्धधूपियत्थेरस्सापदानं पठमं.

२. उदकपूजकत्थेरअपदानं

७. ‘‘सुवण्णवण्णं सम्बुद्धं, गच्छन्तं अनिलञ्जसे;

घतासनंव जलितं, आदित्तंव हुतासनं.

८. ‘‘पाणिना उदकं गय्ह, आकासे उक्खिपिं अहं;

सम्पटिच्छि महावीरो, बुद्धो कारुणिको इसि.

९. ‘‘अन्तलिक्खे ठितो सत्था, पदुमुत्तरनामको;

मम सङ्कप्पमञ्ञाय, इमं गाथमभासथ.

१०. ‘‘‘इमिना दकदानेन, पीतिउप्पादनेन च;

कप्पसतसहस्सम्पि, दुग्गतिं नुपपज्जसि’.

११. ‘‘तेन कम्मेन द्विपदिन्द, लोकजेट्ठ नरासभ;

पत्तोम्हि अचलं ठानं, हित्वा जयपराजयं.

१२. ‘‘सहस्सराजनामेन, तयो च चक्कवत्तिनो;

पञ्चसट्ठिकप्पसते, चातुरन्ता जनाधिपा.

१३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा उदकपूजको थेरो इमा गाथायो अभासित्थाति.

उदकपूजकत्थेरस्सापदानं दुतियं.

३. पुन्नागपुप्फियत्थेरअपदानं

१४. ‘‘काननं वनमोगय्ह, वसामि लुद्दको अहं;

पुन्नागं पुप्फितं दिस्वा, बुद्धसेट्ठं अनुस्सरिं.

१५. ‘‘तं पुप्फं ओचिनित्वान, सुगन्धं गन्धितं सुभं;

थूपं कत्वान पुलिने, बुद्धस्स अभिरोपयिं.

१६. ‘‘द्वेनवुते इतो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

१७. ‘‘एकम्हि नवुते कप्पे, एको आसिं तमोनुदो;

सत्तरतनसम्पन्नो, चक्कवत्ती महब्बलो.

१८. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा पुन्नागपुप्फियो थेरो इमा गाथायो अभासित्थाति.

पुन्नागपुप्फियत्थेरस्सापदानं ततियं.

४. एकदुस्सदायकत्थेरअपदानं

१९. ‘‘नगरे हंसवतिया, अहोसिं तिणहारको;

तिणहारेन जीवामि, तेन पोसेमि दारके.

२०. ‘‘पदुमुत्तरो नाम जिनो, सब्बधम्मान पारगू;

तमन्धकारं नासेत्वा, उप्पज्जि लोकनायको.

२१. ‘‘सके घरे निसीदित्वा, एवं चिन्तेसहं तदा;

‘बुद्धो लोके समुप्पन्नो, देय्यधम्मो च नत्थि मे.

२२. ‘‘‘इदं मे साटकं एकं, नत्थि मे कोचि दायको;

दुक्खो निरयसम्फस्सो, रोपयिस्सामि दक्खिणं’.

२३. ‘‘एवाहं चिन्तयित्वान, सकं चित्तं पसादयिं;

एकं दुस्सं गहेत्वान, बुद्धसेट्ठस्सदासहं.

२४. ‘‘एकं दुस्सं ददित्वान, उक्कुट्ठिं सम्पवत्तयिं;

यदि बुद्धो तुवं वीर, तारेहि मं महामुनि.

२५. ‘‘पदुमुत्तरो लोकविदू, आहुतीनं पटिग्गहो;

मम दानं पकित्तेन्तो, अका मे अनुमोदनं.

२६. ‘‘‘इमिना एकदुस्सेन, चेतनापणिधीहि च;

कप्पसतसहस्सानि, विनिपातं न गच्छति.

२७. ‘‘‘छत्तिंसक्खत्तुं देविन्दो, देवरज्जं करिस्सति;

तेत्तिंसक्खत्तुं राजा च, चक्कवत्ती भविस्सति;

पदेसरज्जं विपुलं, गणनातो असङ्खियं.

२८. ‘‘‘देवलोके मनुस्से वा, संसरन्तो तुवं भवे;

रूपवा गुणसम्पन्नो, अनवक्कन्तदेहवा;

अक्खोभं अमितं दुस्सं, लभिस्ससि यदिच्छकं’.

२९. ‘‘इदं वत्वान सम्बुद्धो, जलजुत्तमनामको;

नभं अब्भुग्गमी धीरो, हंसराजाव अम्बरे.

३०. ‘‘यं यं योनुपपज्जामि, देवत्तं अथ मानुसं;

भोगे मे ऊनता नत्थि, एकदुस्सस्सिदं फलं.

३१. ‘‘पदुद्धारे पदुद्धारे, दुस्सं निब्बत्तते ममं;

हेट्ठा दुस्सम्हि तिट्ठामि, उपरि छदनं मम.

३२. ‘‘चक्कवाळमुपादाय, सकाननं सपब्बतं;

इच्छमानो चहं अज्ज, दुस्सेहि छादयेय्यहं.

३३. ‘‘तेनेव एकदुस्सेन, संसरन्तो भवाभवे;

सुवण्णवण्णो हुत्वान, संसरामि भवाभवे.

३४. ‘‘विपाकं एकदुस्सस्स, नज्झगं कत्थचिक्खयं;

अयं मे अन्तिमा जाति, विपच्चति इधापि मे.

३५. ‘‘सतसहस्सितो कप्पे, यं दुस्समददिं तदा;

दुग्गतिं नाभिजानामि, एकदुस्सस्सिदं फलं.

३६. ‘‘किलेसा झापिता मय्हं, भवा सब्बे समूहता;

नागोव बन्धनं छेत्वा, विहरामि अनासवो.

३७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा एकदुस्सदायको थेरो इमा गाथायो अभासित्थाति.

एकदुस्सदायकत्थेरस्सापदानं चतुत्थं.

५. फुसितकम्पियत्थेरअपदानं

३८. ‘‘विपस्सी नाम [सब्बत्थपि एवमेव दिस्सति]

सम्बुद्धो, लोकजेट्ठो नरासभो.

खीणासवेहि सहितो, सङ्घारामे वसी तदा.

३९. ‘‘आरामद्वारा निक्खम्म, विपस्सी [सब्बत्थपि एवमेव दिस्सति] लोकनायको;

सह सतसहस्सेहि, अट्ठ [सहस्ससतसिस्सेहि, अट्ठ (क.), अट्ठ सतसहस्सेहि, सह (?)] खीणासवेहि सो.

४०. ‘‘अजिनेन निवत्थोहं, वाकचीरधरोपि च;

कुसुमोदकमादाय [कुसुम्भोदक… (सी. स्या.)], सम्बुद्धं उपसङ्कमिं.

४१. ‘‘सकं चित्तं पसादेत्वा, वेदजातो कतञ्जली;

कुसुमोदकमादाय, बुद्धमब्भुक्किरिं अहं.

४२. ‘‘तेन कम्मेन सम्बुद्धो, जलजुत्तमनामको [सब्बत्थपि एवमेव दिस्सति];

मम कम्मं पकित्तेत्वा, अगमा येन पत्थितं.

४३. ‘‘फुसिता पञ्चसहस्सा, येहि पूजेसहं जिनं;

अड्ढतेय्यसहस्सेहि, देवरज्जं अकारयिं.

४४. ‘‘अड्ढतेय्यसहस्सेहि, चक्कवत्ती अहोसहं;

अवसेसेन कम्मेन, अरहत्तमपापुणिं.

४५. ‘‘देवराजा यदा होमि [अहोसिं (स्या. क.)], मनुजाधिपती यदा [तदा (स्या. क.)];

तमेव नामधेय्यं मे, फुसितो नाम होमहं.

४६. ‘‘देवभूतस्स सन्तस्स, अथापि मानुसस्स वा;

समन्ता ब्यामतो मय्हं, फुसितंव पवस्सति.

४७. ‘‘भवा उग्घाटिता मय्हं, किलेसा झापिता मम;

सब्बासवपरिक्खीणो, फुसितस्स इदं फलं.

४८. ‘‘चन्दनस्सेव मे काया, तथा गन्धो पवायति;

सरीरतो मम गन्धो, अड्ढकोसे पवायति.

४९. ‘‘दिब्बगन्धं सम्पवन्तं, पुञ्ञकम्मसमङ्गिनं;

गन्धं घत्वान जानन्ति, फुसितो आगतो इध.

५०. ‘‘साखापलासकट्ठानि, तिणानिपि च सब्बसो;

मम सङ्कप्पमञ्ञाय, गन्धो सम्पज्जते खणे.

५१. ‘‘सतसहस्सितो [सब्बत्थपि एवमेव दिस्सति] कप्पे, चन्दनं अभिपूजयिं;

दुग्गतिं नाभिजानामि, फुसितस्स इदं फलं.

५२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा फुसितकम्पियो थेरो इमा गाथायो अभासित्थाति.

फुसितकम्पियत्थेरस्सापदानं पञ्चमं.

६. पभङ्करत्थेरअपदानं

५३. ‘‘पदुमुत्तरभगवतो, लोकजेट्ठस्स तादिनो;

विपिने चेतियं आसि, वाळमिगसमाकुले.

५४. ‘‘न कोचि विसहि गन्तुं, चेतियं अभिवन्दितुं;

तिणकट्ठलतोनद्धं, पलुग्गं आसि चेतियं.

५५. ‘‘वनकम्मिको तदा आसिं, पितुमातुमतेनहं [पितुपेतामहेनहं (सी.), पितापेतामहेनहं (स्या.)];

अद्दसं विपिने थूपं, लुग्गं तिणलताकुलं.

५६. ‘‘दिस्वानाहं बुद्धथूपं, गरुचित्तं उपट्ठहिं;

बुद्धसेट्ठस्स थूपोयं, पलुग्गो अच्छती वने.

५७. ‘‘नच्छन्नं नप्पतिरूपं, जानन्तस्स गुणागुणं;

बुद्धथूपं असोधेत्वा, अञ्ञं कम्मं पयोजये.

५८. ‘‘तिणकट्ठञ्च वल्लिञ्च, सोधयित्वान चेतिये;

वन्दित्वा अट्ठ वारानि [अट्ठ ठानानि (क.)], पटिकुटिको अगच्छहं.

५९. ‘‘तेन कम्मेन सुकतेन, चेतनापणिधीहि च;

जहित्वा मानुसं देहं, तावतिंसमगच्छहं.

६०. ‘‘तत्थ मे सुकतं ब्यम्हं, सोवण्णं सपभस्सरं;

सट्ठियोजनमुब्बिद्धं, तिंसयोजनवित्थतं.

६१. ‘‘तिसतानि च वारानि, देवरज्जमकारयिं;

पञ्चवीसतिक्खत्तुञ्च, चक्कवत्ती अहोसहं.

६२. ‘‘भवाभवे संसरन्तो, महाभोगं लभामहं;

भोगे मे ऊनता नत्थि, सोधनाय इदं फलं.

६३. ‘‘सिविका हत्थिखन्धेन, विपिने गच्छतो मम;

यं यं दिसाहं गच्छामि, सरणं सम्पते [सिज्झते (क.)] वनं.

६४. ‘‘खाणुं वा कण्टकं वापि, नाहं पस्सामि चक्खुना;

पुञ्ञकम्मेन संयुत्तो, सयमेवापनीयरे.

६५. ‘‘कुट्ठं गण्डो किलासो च, अपमारो वितच्छिका;

दद्दु कच्छु [कण्डु (स्या.)] च मे नत्थि, सोधनाय इदं फलं.

६६. ‘‘अञ्ञम्पि मे अच्छरियं, बुद्धथूपस्स सोधने [बुद्धथूपम्हि सोधिते (स्या.)];

नाभिजानामि मे काये, जातं पिळकबिन्दुकं.

६७. ‘‘अञ्ञम्पि मे अच्छरियं, बुद्धथूपम्हि सोधिते [सब्बत्थपि एवमेव दिस्सति, तथा उपरिपि];

दुवे भवे संसरामि, देवत्ते अथ मानुसे.