१. पण्णदायकत्थेरअपदानं

१. ‘‘पण्णसाले निसिन्नोम्हि, पण्णभोजनभोजनो;

उपविट्ठञ्च मं सन्तं, उपागच्छि महाइसि [महामुनि (सी.)].

२. ‘‘सिद्धत्थो लोकपज्जोतो, सब्बलोकतिकिच्छको;

तस्स पण्णं मया दिन्नं, निसिन्नं [निसिन्नस्स (स्या. अट्ठ.)] पण्णसन्थरे.

३. ‘‘चतुन्नवुतितो कप्पे, यं पण्णमददिं तदा;

दुग्गतिं नाभिजानामि, पण्णदानस्सिदं फलं.

४. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा पण्णदायको थेरो इमा गाथायो अभासित्थाति.

पण्णदायकत्थेरस्सापदानं पठमं.