२९. पण्णदायकवग्गो

१. पण्णदायकत्थेरअपदानं

१. ‘‘पण्णसाले निसिन्नोम्हि, पण्णभोजनभोजनो;

उपविट्ठञ्च मं सन्तं, उपागच्छि महाइसि [महामुनि (सी.)].

२. ‘‘सिद्धत्थो लोकपज्जोतो, सब्बलोकतिकिच्छको;

तस्स पण्णं मया दिन्नं, निसिन्नं [निसिन्नस्स (स्या. अट्ठ.)] पण्णसन्थरे.

३. ‘‘चतुन्नवुतितो कप्पे, यं पण्णमददिं तदा;

दुग्गतिं नाभिजानामि, पण्णदानस्सिदं फलं.

४. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा पण्णदायको थेरो इमा गाथायो अभासित्थाति.

पण्णदायकत्थेरस्सापदानं पठमं.

२. फलदायकत्थेरअपदानं

५. ‘‘सिनेरुसमसन्तोसो, धरणीसम [धरणीधर (सी. स्या.)] सादिसो;

वुट्ठहित्वा समाधिम्हा, भिक्खाय ममुपट्ठितो.

६. ‘‘हरीतकं [हरीतकिं (स्या.)] आमलकं, अम्बजम्बुविभीतकं;

कोलं भल्लातकं बिल्लं, फारुसकफलानि च.

७. ‘‘सिद्धत्थस्स महेसिस्स, सब्बलोकानुकम्पिनो;

तञ्च सब्बं मया दिन्नं, विप्पसन्नेन चेतसा.

८. ‘‘चतुन्नवुतितो कप्पे, यं फलं अददिं तदा;

दुग्गतिं नाभिजानामि, फलदानस्सिदं फलं.

९. ‘‘सत्तपञ्ञासितो कप्पे, एकज्झो नाम खत्तियो;

सत्तरतनसम्पन्नो, चक्कवत्ती महब्बलो.

१०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा फलदायको थेरो इमा गाथायो अभासित्थाति.

फलदायकत्थेरस्सापदानं दुतियं.

३. पच्चुग्गमनियत्थेरअपदानं

११. ‘‘सीहं यथा वनचरं, निसभाजानियं यथा;

ककुधं विलसन्तंव, आगच्छन्तं नरासभं.

१२. ‘‘सिद्धत्थं लोकपज्जोतं, सब्बलोकतिकिच्छकं;

अकासिं पच्चुग्गमनं, विप्पसन्नेन चेतसा.

१३. ‘‘चतुन्नवुतितो कप्पे, पच्चुग्गच्छिं नरासभं;

दुग्गतिं नाभिजानामि, पच्चुग्गमने इदं फलं.

१४. ‘‘सत्ततिंसे [सत्तवीसे (सी. स्या.)] इतो कप्पे, एको आसिं जनाधिपो;

सपरिवारोति नामेन, चक्कवत्ती महब्बलो.

१५. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा पच्चुग्गमनियो थेरो इमा गाथायो अभासित्थाति.

पच्चुग्गमनियत्थेरस्सापदानं ततियं.

४. एकपुप्फियत्थेरअपदानं

१६. ‘‘दक्खिणम्हि दुवारम्हि, पिसाचो आसहं तदा;

अद्दसं विरजं बुद्धं, पीतरंसिंव भाणुमं.

१७. ‘‘विपस्सिस्स नरग्गस्स, सब्बलोकहितेसिनो;

एकपुप्फं मया दिन्नं, द्विपदिन्दस्स तादिनो.

१८. ‘‘एकनवुतितो कप्पे, यं पुप्फमददिं तदा;

दुग्गतिं नाभिजानामि, बुद्धपूजायिदं फलं.

१९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा एकपुप्फियो थेरो इमा गाथायो अभासित्थाति.

एकपुप्फियत्थेरस्सापदानं चतुत्थं.

५. मघवपुप्फियत्थेरअपदानं

२०. ‘‘नम्मदानदिया तीरे, सयम्भू अपराजितो;

समाधिं सो समापन्नो, विप्पसन्नो अनाविलो.

२१. ‘‘दिस्वा पसन्नसुमनो, सम्बुद्धं अपराजितं;

ताहं मघवपुप्फेन, सयम्भुं पूजयिं तदा.

२२. ‘‘एकनवुतितो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

२३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा मघवपुप्फियो थेरो इमा गाथायो अभासित्थाति.

मघवपुप्फियत्थेरस्सापदानं पञ्चमं.

६. उपट्ठाकदायकत्थेरअपदानं

२४. ‘‘रथियं पटिपज्जन्तं, आहुतीनं पटिग्गहं;

द्विपदिन्दं महानागं, लोकजेट्ठं नरासभं.

२५. ‘‘पक्कोसापिय तस्साहं, सब्बलोकहितेसिनो;

उपट्ठाको मया दिन्नो, सिद्धत्थस्स महेसिनो.

२६. ‘‘पटिग्गहेत्वा [पटिग्गहेसि (क.)] सम्बुद्धो, निय्यादेसि महामुनि [महाइसि (क.)];

उट्ठाय आसना तम्हा, पक्कामि पाचिनामुखो.

२७. ‘‘चतुन्नवुतितो कप्पे, उपट्ठाकमदं तदा;

दुग्गतिं नाभिजानामि, उपट्ठानस्सिदं फलं.

२८. ‘‘सत्तपञ्ञासितो कप्पे, बलसेनसनामको;

सत्तरतनसम्पन्नो, चक्कवत्ती महब्बलो.

२९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा उपट्ठाकदायको थेरो इमा गाथायो अभासित्थाति.

उपट्ठाकदायकत्थेरस्सापदानं छट्ठं.

७. अपदानियत्थेरअपदानं

३०. ‘‘अपदानं सुगतानं, कित्तयिंहं महेसिनं;

पादे च सिरसा वन्दिं, पसन्नो सेहि पाणिभि.

३१. ‘‘द्वेनवुते इतो कप्पे, अपदानं पकित्तयिं;

दुग्गतिं नाभिजानामि, कित्तनाय इदं फलं.

३२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा अपदानियो थेरो इमा गाथायो अभासित्थाति.

अपदानियत्थेरस्सापदानं सत्तमं.

८. सत्ताहपब्बजितत्थेरअपदानं

३३. ‘‘विपस्सिस्स भगवतो, सङ्घो सक्कतमानितो;

ब्यसनं मे अनुप्पत्तं, ञातिभेदो पुरे अहु.

३४. ‘‘पब्बज्जं उपगन्त्वान, ब्यसनुपसमायहं;

सत्ताहाभिरतो तत्थ, सत्थुसासनकम्यता.

३५. ‘‘एकनवुतितो कप्पे, यमहं पब्बजिं तदा;

दुग्गतिं नाभिजानामि, पब्बज्जाय इदं फलं.

३६. ‘‘सत्तसट्ठिम्हितो कप्पे, सत्त आसुं महीपती;

सुनिक्खमाति ञायन्ति, चक्कवत्ती महब्बला.

३७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सत्ताहपब्बजितो थेरो इमा गाथायो अभासित्थाति.

सत्ताहपब्बजितत्थेरस्सापदानं अट्ठमं.

९. बुद्धुपट्ठायिकत्थेरअपदानं

३८. ‘‘वेटम्भिनीति [वेटम्बरीति (सी.), वेधम्भिनीति (स्या.)] मे नामं, पितुसन्तं [पिता’सन्तं (?)] ममं तदा;

मम हत्थं गहेत्वान, उपानयि महामुनिं.

३९. ‘‘इमेमं उद्दिसिस्सन्ति, बुद्धा लोकग्गनायका;

तेहं उपट्ठिं सक्कच्चं, पसन्नो सेहि पाणिभि.

४०. ‘‘एकत्तिंसे इतो कप्पे, बुद्धे उपट्ठहिं [परिचरिं (सी. स्या.)] तदा;

दुग्गतिं नाभिजानामि, उपट्ठानस्सिदं फलं.

४१. ‘‘तेवीसम्हि इतो कप्पे, चतुरो आसु खत्तिया;

समणुपट्ठाका नाम, चक्कवत्ती महब्बला.

४२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा बुद्धुपट्ठायिको थेरो इमा गाथायो अभासित्थाति.

बुद्धुपट्ठायिकत्थेरस्सापदानं नवमं.

१०. पुब्बङ्गमियत्थेरअपदानं

४३. ‘‘चुल्लासीतिसहस्सानि, पब्बजिम्ह अकिञ्चना;

तेसं पुब्बङ्गमो आसिं, उत्तमत्थस्स पत्तिया.

४४. ‘‘सरागा सभवा [समोहा (स्या.)] चेते, विप्पसन्नमनाविला;

उपट्ठहिंसु सक्कच्चं, पसन्ना सेहि पाणिभि.

४५. ‘‘खीणासवा वन्तदोसा, कतकिच्चा अनासवा;

फरिंसु मेत्तचित्तेन, सयम्भू अपराजिता.

४६. ‘‘तेसं उपट्ठहित्वान, सम्बुद्धानं पतिस्सतो;

मरणञ्च अनुप्पत्तो, देवत्तञ्च अगम्हसे.

४७. ‘‘चतुन्नवुतितो कप्पे, यं सीलमनुपालयिं;

दुग्गतिं नाभिजानामि, सञ्ञमस्स इदं फलं.

४८. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा पुब्बङ्गमियो थेरो इमा गाथायो अभासित्थाति.

पुब्बङ्गमियत्थेरस्सापदानं दसमं.

पण्णदायकवग्गो एकूनतिंसतिमो.