४. तरणियत्थेरअपदानं

१५. ‘‘अत्थदस्सी तु भगवा, द्विपदिन्दो नरासभो;

पुरक्खतो सावकेहि, गङ्गातीरमुपागमि.

१६. ‘‘समतित्ति काकपेय्या, गङ्गा आसि दुरुत्तरा;

उत्तारयिं भिक्खुसङ्घं, बुद्धञ्च द्विपदुत्तमं.

१७. ‘‘अट्ठारसे कप्पसते, यं कम्ममकरिं तदा;

दुग्गतिं नाभिजानामि, तरणाय इदं फलं.

१८. ‘‘तेरसेतो कप्पसते, पञ्च सब्बोभवा [सब्भोगवा (सी.)] अहुं;

सत्तरतनसम्पन्ना, चक्कवत्ती महब्बला.

१९. ‘‘पच्छिमे च भवे अस्मिं, जातोहं ब्राह्मणे कुले;

सद्धिं तीहि सहायेहि, पब्बजिं सत्थु सासने.

२०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा तरणियो थेरो इमा गाथायो अभासित्थाति;

तरणियत्थेरस्सापदानं चतुत्थं.