२१. कणिकारपुप्फियवग्गो

१. कणिकारपुप्फियत्थेरअपदानं

१. ‘‘कणिकारं पुप्फितं दिस्वा, ओचिनित्वानहं तदा;

तिस्सस्स अभिरोपेसिं, ओघतिण्णस्स तादिनो.

२. ‘‘द्वेनवुते इतो कप्पे, यं पुप्फमभिरोपयिं;

दुग्गतिं नाभिजानामि, बुद्धपूजायिदं फलं.

३. ‘‘पञ्चत्तिंसे इतो कप्पे, अरुणपाणीति विस्सुतो;

सत्तरतनसम्पन्नो, चक्कवत्ती महब्बलो.

४. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा कणिकारपुप्फियो थेरो इमा गाथायो अभासित्थाति.

कणिकारपुप्फियत्थेरस्सापदानं पठमं.

२. मिनेलपुप्फियत्थेरअपदानं

५. ‘‘सुवण्णवण्णो भगवा, सतरंसी पतापवा;

चङ्कमनं समारूळ्हो, मेत्तचित्तो सिखीसभो.

६. ‘‘पसन्नचित्तो सुमनो, वन्दित्वा [थोमेत्वा (स्या.)] ञाणमुत्तमं;

मिनेलपुप्फं पग्गय्ह, बुद्धस्स अभिरोपयिं.

७. ‘‘एकत्तिंसे इतो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

८. ‘‘एकूनतिंसकप्पम्हि, सुमेघघननामको;

सत्तरतनसम्पन्नो, चक्कवत्ती महब्बलो.

९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा मिनेलपुप्फियो थेरो इमा गाथायो अभासित्थाति.

मिनेलपुप्फियत्थेरस्सापदानं दुतियं.

३. किङ्कणिपुप्फियत्थेरअपदानं

१०. ‘‘कञ्चनग्घियसङ्कासो, सब्बञ्ञू लोकनायको;

ओदकं दहमोग्गय्ह, सिनायि लोकनायको.

११. ‘‘पग्गय्ह किङ्कणिं [किङ्किणिं (सी.)] पुप्फं, विपस्सिस्साभिरोपयिं;

उदग्गचित्तो सुमनो, द्विपदिन्दस्स तादिनो.

१२. ‘‘एकनवुतितो कप्पे, यं पुप्फमभिरोपयिं;

दुग्गतिं नाभिजानामि, बुद्धपूजायिदं फलं.

१३. ‘‘सत्तवीसतिकप्पम्हि, राजा भीमरथो अहु;

सत्तरतनसम्पन्नो, चक्कवत्ती महब्बलो.

१४. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा किङ्कणिपुप्फियो [किङ्किणिकपुप्फियो (सी.)] थेरो इमा गाथायो अभासित्थाति.

किङ्कणिपुप्फियत्थेरस्सापदानं ततियं.

४. तरणियत्थेरअपदानं

१५. ‘‘अत्थदस्सी तु भगवा, द्विपदिन्दो नरासभो;

पुरक्खतो सावकेहि, गङ्गातीरमुपागमि.

१६. ‘‘समतित्ति काकपेय्या, गङ्गा आसि दुरुत्तरा;

उत्तारयिं भिक्खुसङ्घं, बुद्धञ्च द्विपदुत्तमं.

१७. ‘‘अट्ठारसे कप्पसते, यं कम्ममकरिं तदा;

दुग्गतिं नाभिजानामि, तरणाय इदं फलं.

१८. ‘‘तेरसेतो कप्पसते, पञ्च सब्बोभवा [सब्भोगवा (सी.)] अहुं;

सत्तरतनसम्पन्ना, चक्कवत्ती महब्बला.

१९. ‘‘पच्छिमे च भवे अस्मिं, जातोहं ब्राह्मणे कुले;

सद्धिं तीहि सहायेहि, पब्बजिं सत्थु सासने.

२०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा तरणियो थेरो इमा गाथायो अभासित्थाति;

तरणियत्थेरस्सापदानं चतुत्थं.

५. निग्गुण्डिपुप्फियत्थेरअपदानं

२१. ‘‘विपस्सिस्स भगवतो, आसिमारामिको अहं;

निग्गुण्डिपुप्फं पग्गय्ह, बुद्धस्स अभिरोपयिं.

२२. ‘‘एकनवुतितो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

२३. ‘‘पञ्चवीसे [पञ्चतिंसे (सी. स्या.)] इतो कप्पे, एको आसिं जनाधिपो;

महापतापनामेन, चक्कवत्ती महब्बलो.

२४. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा निग्गुण्डिपुप्फियो थेरो इमा गाथायो अभासित्थाति.

निग्गुण्डिपुप्फियत्थेरस्सापदानं पञ्चमं.

६. उदकदायकत्थेरअपदानं

२५. ‘‘भुञ्जन्तं समणं दिस्वा, विप्पसन्नमनाविलं;

घटेनोदकमादाय, सिद्धत्थस्स अदासहं.

२६. ‘‘निम्मलो होमहं अज्ज, विमलो खीणसंसयो;

भवे निब्बत्तमानम्हि, फलं निब्बत्तते मम [सुभं (सी.)].

२७. ‘‘चतुन्नवुतितो कप्पे, उदकं यमदासहं [यं तदा अदं (सी.), अददिं तदा (स्या.)];

दुग्गतिं नाभिजानामि, दकदानस्सिदं फलं.

२८. ‘‘एकसट्ठिम्हितो कप्पे, एकोव विमलो अहु;

सत्तरतनसम्पन्नो, चक्कवत्ती महब्बलो.

२९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा उदकदायको थेरो इमा गाथायो अभासित्थाति.

उदकदायकत्थेरस्सापदानं छट्ठं.

७. सललमालियत्थेरअपदानं

३०. ‘‘कणिकारंव जोतन्तं, निसिन्नं पब्बतन्तरे;

ओभासेन्तं दिसा सब्बा, सिद्धत्थं नरसारथिं.

३१. ‘‘धनुं अद्वेज्झं कत्वान, उसुं सन्नय्हहं तदा;

पुप्फं सवण्टं छेत्वान, बुद्धस्स अभिरोपयिं.

३२. ‘‘चतुन्नवुतितो कप्पे, यं पुप्फमभिरोपयिं;

दुग्गतिं नाभिजानामि, बुद्धपूजायिदं फलं.

३३. ‘‘एकपञ्ञासितो कप्पे, एको आसिं जुतिन्धरो;

सत्तरतनसम्पन्नो, चक्कवत्ती महब्बलो.

३४. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सललमालियो थेरो इमा गाथायो अभासित्थाति.

सललमालियत्थेरस्सापदानं सत्तमं.

८. कोरण्डपुप्फियत्थेरअपदानं

३५. ‘‘अक्कन्तञ्च पदं दिस्वा, चक्कालङ्कारभूसितं;

पदेनानुपदं यन्तो, विपस्सिस्स महेसिनो.

३६. ‘‘कोरण्डं पुप्फितं दिस्वा, समूलं पूजितं मया;

हट्ठो हट्ठेन चित्तेन, अवन्दिं पदमुत्तमं.

३७. ‘‘एकनवुतितो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

३८. ‘‘सत्तपञ्ञासकप्पम्हि, एको वीतमलो अहुं;

सत्तरतनसम्पन्नो, चक्कवत्ती महब्बलो.

३९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा कोरण्डपुप्फियो थेरो इमा गाथायो अभासित्थाति.

कोरण्डपुप्फियत्थेरस्सापदानं अट्ठमं.

९. आधारदायकत्थेरअपदानं

४०. ‘‘आधारकं मया दिन्नं, सिखिनो लोकबन्धुनो;

धारेमि पथविं सब्बं, केवलं वसुधं इमं.

४१. ‘‘किलेसा झापिता मय्हं, भवा सब्बे समूहता;

धारेमि अन्तिमं देहं, सम्मासम्बुद्धसासने.

४२. ‘‘सत्तवीसे इतो कप्पे, अहेसुं चतुरो जना;

समन्तवरणा नाम, चक्कवत्ती महब्बला.

४३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा आधारदायको [परियादानियो (क.)] थेरो इमा गाथायो अभासित्थाति.

आधारदायकत्थेरस्सापदानं नवमं.

१०. पापनिवारियत्थेरअपदानं

४४. ‘‘तिस्सस्स तु भगवतो, देवदेवस्स तादिनो;

एकच्छत्तं मया दिन्नं, विप्पसन्नेन चेतसा.

४५. ‘‘निवुतं होति मे पापं, कुसलस्सुपसम्पदा;

आकासे छत्तं धारेन्ति, पुब्बकम्मस्सिदं फलं.

४६. ‘‘चरिमं वत्तते मय्हं, भवा सब्बे समूहता;

धारेमि अन्तिमं देहं, सम्मासम्बुद्धसासने.

४७. ‘‘द्वेनवुते इतो कप्पे, यं छत्तमददिं तदा;

दुग्गतिं नाभिजानामि, छत्तदानस्सिदं फलं.

४८. ‘‘द्वेसत्ततिम्हितो कप्पे, अट्ठासिंसु जनाधिपा;

महानिदाननामेन, राजानो चक्कवत्तिनो.

४९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा पापनिवारियो [वातातपनिवारियो (सी.)] थेरो इमा गाथायो अभासित्थाति;

पापनिवारियत्थेरस्सापदानं दसमं.

कणिकारपुप्फियवग्गो एकवीसतिमो.