५. निग्गुण्डिपुप्फियत्थेरअपदानं

२१. ‘‘विपस्सिस्स भगवतो, आसिमारामिको अहं;

निग्गुण्डिपुप्फं पग्गय्ह, बुद्धस्स अभिरोपयिं.

२२. ‘‘एकनवुतितो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

२३. ‘‘पञ्चवीसे [पञ्चतिंसे (सी. स्या.)] इतो कप्पे, एको आसिं जनाधिपो;

महापतापनामेन, चक्कवत्ती महब्बलो.

२४. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा निग्गुण्डिपुप्फियो थेरो इमा गाथायो अभासित्थाति.

निग्गुण्डिपुप्फियत्थेरस्सापदानं पञ्चमं.