२. मिनेलपुप्फियत्थेरअपदानं

५. ‘‘सुवण्णवण्णो भगवा, सतरंसी पतापवा;

चङ्कमनं समारूळ्हो, मेत्तचित्तो सिखीसभो.

६. ‘‘पसन्नचित्तो सुमनो, वन्दित्वा [थोमेत्वा (स्या.)] ञाणमुत्तमं;

मिनेलपुप्फं पग्गय्ह, बुद्धस्स अभिरोपयिं.

७. ‘‘एकत्तिंसे इतो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

८. ‘‘एकूनतिंसकप्पम्हि, सुमेघघननामको;

सत्तरतनसम्पन्नो, चक्कवत्ती महब्बलो.

९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा मिनेलपुप्फियो थेरो इमा गाथायो अभासित्थाति.

मिनेलपुप्फियत्थेरस्सापदानं दुतियं.