१. कणिकारपुप्फियत्थेरअपदानं

१. ‘‘कणिकारं पुप्फितं दिस्वा, ओचिनित्वानहं तदा;

तिस्सस्स अभिरोपेसिं, ओघतिण्णस्स तादिनो.

२. ‘‘द्वेनवुते इतो कप्पे, यं पुप्फमभिरोपयिं;

दुग्गतिं नाभिजानामि, बुद्धपूजायिदं फलं.

३. ‘‘पञ्चत्तिंसे इतो कप्पे, अरुणपाणीति विस्सुतो;

सत्तरतनसम्पन्नो, चक्कवत्ती महब्बलो.

४. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा कणिकारपुप्फियो थेरो इमा गाथायो अभासित्थाति.

कणिकारपुप्फियत्थेरस्सापदानं पठमं.