६. तिपुप्फियत्थेरअपदानं

३१. ‘‘मिगलुद्दो पुरे आसिं, अरञ्ञे कानने अहं [ब्रहा (स्या.)];

पाटलिं हरितं दिस्वा, तीणि पुप्फानि ओकिरिं.

३२. ‘‘पतितपत्तानि [सत्तपत्तानि (सी.), सतपत्तानि (क.), सुक्खपण्णानि (स्या.)] गण्हित्वा, बहि छड्डेसहं तदा;

अन्तोसुद्धं बहिसुद्धं, सुविमुत्तं अनासवं.

३३. ‘‘सम्मुखा विय सम्बुद्धं, विपस्सिं लोकनायकं;

पाटलिं अभिवादेत्वा, तत्थ कालङ्कतो अहं.

३४. ‘‘एकनवुतितो कप्पे, यं बोधिमभिपूजयिं;

दुग्गतिं नाभिजानामि, बोधिपूजायिदं फलं.

३५. ‘‘समन्तपासादिका नाम, तेरसासिंसु राजिनो;

इतो तेत्तिंसकप्पम्हि [तिंसतिकप्पम्हि (स्या.)], चक्कवत्ती महब्बला.

३६. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा तिपुप्फियो थेरो इमा गाथायो अभासित्थाति.

तिपुप्फियत्थेरस्सापदानं छट्ठं.