१०. सुधावग्गो

१. सुधापिण्डियत्थेरअपदानं

१. ‘‘पूजारहे पूजयतो, बुद्धे यदि व सावके;

पपञ्चसमतिक्कन्ते, तिण्णसोकपरिद्दवे.

२. ‘‘ते तादिसे पूजयतो, निब्बुते अकुतोभये;

न सक्का पुञ्ञं सङ्खातुं, इमेत्तमपि [इदम्मत्तन्ति (सी.), इमेत्थमपि (क.)] केनचि.

३. ‘‘चतुन्नमपि दीपानं, इस्सरं योध कारये;

एकिस्सा पूजनायेतं, कलं नाग्घति सोळसिं.

४. ‘‘सिद्धत्थस्स नरग्गस्स, चेतिये फलितन्तरे;

सुधापिण्डो मया दिन्नो, विप्पसन्नेन चेतसा.

५. ‘‘चतुन्नवुतितो कप्पे, यं कम्ममकरिं तदा;

दुग्गतिं नाभिजानामि, पटिसङ्खारस्सिदं फलं.

६. ‘‘इतो तिंसतिकप्पम्हि, पटिसङ्खारसव्हया;

सत्तरतनसम्पन्ना, तेरस चक्कवत्तिनो.

७. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा सुधापिण्डियो थेरो इमा गाथायो अभासित्थाति.

सुधापिण्डियत्थेरस्सापदानं पठमं.

२. सुचिन्तिकत्थेरअपदानं

८. ‘‘तिस्सस्स लोकनाथस्स, सुद्धपीठमदासहं;

हट्ठो हट्ठेन चित्तेन, बुद्धस्सादिच्चबन्धुनो.

९. ‘‘अट्ठारसे [अट्ठतिंसे (सी. स्या.)] इतो कप्पे, राजा आसिं महारुचि;

भोगो च विपुलो आसि, सयनञ्च अनप्पकं.

१०. ‘‘पीठं बुद्धस्स दत्वान, विप्पसन्नेन चेतसा;

अनुभोमि सकं कम्मं, पुब्बे सुकतमत्तनो.

११. ‘‘द्वेनवुते इतो कप्पे, यं पीठमददिं तदा;

दुग्गतिं नाभिजानामि, पीठदानस्सिदं फलं.

१२. ‘‘अट्ठतिंसे इतो कप्पे, तयो ते चक्कवत्तिनो;

रुचि उपरुचि चेव, महारुचि ततियको.

१३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सुचिन्तिको थेरो इमा गाथायो अभासित्थाति.

सुचिन्तिकत्थेरस्सापदानं दुतियं.

३. अड्ढचेळकत्थेरअपदानं

१४. ‘‘तिस्सस्साहं भगवतो, उपड्ढदुस्समदासहं;

परमकापञ्ञपत्तोम्हि [परमकारुञ्ञपत्तोम्हि (स्या. क.)], दुग्गतेन [दुग्गन्धेन (सी.)] समप्पितो.

१५. ‘‘उपड्ढदुस्सं दत्वान, कप्पं सग्गम्हि मोदहं;

अवसेसेसु कप्पेसु, कुसलं कारितं मया.

१६. ‘‘द्वेनवुते इतो कप्पे, यं दुस्समददिं तदा;

दुग्गतिं नाभिजानामि, दुस्सदानस्सिदं फलं.

१७. ‘‘एकूनपञ्ञासकप्पम्हि [एकपञ्ञासकप्पम्हि (स्या.)], राजानो चक्कवत्तिनो;

समन्तच्छदना नाम, बात्तिंसासुं [खत्तियासुं (स्या. क.)] जनाधिपा.

१८. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा अड्ढचेळको थेरो इमा गाथायो अभासित्थाति.

अड्ढचेळकत्थेरस्सापदानं ततियं.

४. सूचिदायकत्थेरअपदानं

१९. ‘‘कम्मारोहं पुरे आसिं, बन्धुमायं पुरुत्तमे;

सूचिदानं मया दिन्नं, विपस्सिस्स महेसिनो.

२०. ‘‘वजिरग्गसमं ञाणं, होति कम्मेन तादिसं;

विरागोम्हि विमुत्तोम्हि [विभवोम्हि विभत्तोम्हि (क.)], पत्तोम्हि आसवक्खयं.

२१. ‘‘अतीते च भवे सब्बे, वत्तमाने चनागते [अतीता च भवा सब्बे, वत्तमाना च’नागता (स्या. क.)];

ञाणेन विचिनिं सब्बं, सूचिदानस्सिदं फलं.

२२. ‘‘एकनवुतितो कप्पे, सत्तासुं वजिरव्हया;

सत्तरतनसम्पन्ना, चक्कवत्ती महब्बला.

२३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सूचिदायको थेरो इमा गाथायो अभासित्थाति.

सूचिदायकत्थेरस्सापदानं चतुत्थं.

५. गन्धमालियत्थेरअपदानं

२४. ‘‘सिद्धत्थस्स भगवतो, गन्धथूपं अकासहं;

सुमनेहि पटिच्छन्नं, बुद्धानुच्छविकं कतं.

२५. ‘‘कञ्चनग्घियसङ्कासं, बुद्धं लोकग्गनायकं;

इन्दीवरंव जलितं, आदित्तंव हुतासनं.

२६. ‘‘ब्यग्घूसभंव पवरं, अभिजातंव केसरिं;

निसिन्नं समणानग्गं, भिक्खुसङ्घपुरक्खतं.

२७. ‘‘वन्दित्वा सत्थुनो पादे, पक्कामिं उत्तरामुखो;

चतुन्नवुतितो कप्पे, गन्धमालं यतो अदं.

२८. ‘‘बुद्धे कतस्स कारस्स, फलेनाहं विसेसतो;

दुग्गतिं नाभिजानामि, बुद्धपूजायिदं फलं.

२९. ‘‘चत्तारीसम्हि एकूने, कप्पे आसिंसु सोळस;

देवगन्धसनामा ते, राजानो चक्कवत्तिनो.

३०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा गन्धमालियो थेरो इमा गाथायो अभासित्थाति.

गन्धमालियत्थेरस्सापदानं पञ्चमं.

६. तिपुप्फियत्थेरअपदानं

३१. ‘‘मिगलुद्दो पुरे आसिं, अरञ्ञे कानने अहं [ब्रहा (स्या.)];

पाटलिं हरितं दिस्वा, तीणि पुप्फानि ओकिरिं.

३२. ‘‘पतितपत्तानि [सत्तपत्तानि (सी.), सतपत्तानि (क.), सुक्खपण्णानि (स्या.)] गण्हित्वा, बहि छड्डेसहं तदा;

अन्तोसुद्धं बहिसुद्धं, सुविमुत्तं अनासवं.

३३. ‘‘सम्मुखा विय सम्बुद्धं, विपस्सिं लोकनायकं;

पाटलिं अभिवादेत्वा, तत्थ कालङ्कतो अहं.

३४. ‘‘एकनवुतितो कप्पे, यं बोधिमभिपूजयिं;

दुग्गतिं नाभिजानामि, बोधिपूजायिदं फलं.

३५. ‘‘समन्तपासादिका नाम, तेरसासिंसु राजिनो;

इतो तेत्तिंसकप्पम्हि [तिंसतिकप्पम्हि (स्या.)], चक्कवत्ती महब्बला.

३६. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा तिपुप्फियो थेरो इमा गाथायो अभासित्थाति.

तिपुप्फियत्थेरस्सापदानं छट्ठं.

७. मधुपिण्डिकत्थेरअपदानं

३७. ‘‘विपिने [विवने (स्या. अट्ठ.)] कानने दिस्वा, अप्पसद्दे निराकुले;

सिद्धत्थं इसिनं सेट्ठं, आहुतीनं पटिग्गहं.

३८. ‘‘निब्बुतत्तं [निब्बुतग्गं (क.), निब्बूतिकं (स्या.)] महानागं, निसभाजानियं यथा;

ओसधिंव विरोचन्तं, देवसङ्घनमस्सितं.

३९. ‘‘वित्ति ममाहु तावदे [वित्ति मे पाहुना ताव (सी. स्या.)], ञाणं उप्पज्जि तावदे;

वुट्ठितस्स समाधिम्हा, मधुं दत्वान सत्थुनो.

४०. ‘‘वन्दित्वा सत्थुनो पादे, पक्कामिं पाचिनामुखो;

चतुत्तिंसम्हि कप्पम्हि, राजा आसिं सुदस्सनो.

४१. ‘‘मधु भिसेहि सवति, भोजनम्हि च तावदे;

मधुवस्सं पवस्सित्थ, पुब्बकम्मस्सिदं फलं.

४२. ‘‘चतुन्नवुतितो कप्पे, यं मधुं अददिं तदा;

दुग्गतिं नाभिजानामि, मधुदानस्सिदं फलं.

४३. ‘‘चतुत्तिंसे इतो कप्पे, चत्तारो ते सुदस्सना;

सत्तरतनसम्पन्ना, चक्कवत्ती महब्बला.

४४. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा मधुपिण्डिको थेरो इमा गाथायो अभासित्थाति.

मधुपिण्डिकत्थेरस्सापदानं सत्तमं.

८. सेनासनदायकत्थेरअपदानं

४५. ‘‘सिद्धत्थस्स भगवतो, अदासिं पण्णसन्थरं;

समन्ता उपहारञ्च, कुसुमं ओकिरिं अहं.

४६. ‘‘पासादेवं गुणं रम्मं [पासादे च गुहं रम्मं (स्या.)], अनुभोमि महारहं;

महग्घानि च पुप्फानि, सयनेभिसवन्ति मे.

४७. ‘‘सयनेहं तुवट्टामि, विचित्ते पुप्फसन्थते;

पुप्फवुट्ठि च सयने, अभिवस्सति तावदे.

४८. ‘‘चतुन्नवुतितो कप्पे, अदासिं पण्णसन्थरं;

दुग्गतिं नाभिजानामि, सन्थरस्स इदं फलं.

४९. ‘‘तिणसन्थरका नाम, सत्तेते चक्कवत्तिनो;

इतो ते पञ्चमे कप्पे, उप्पज्जिंसु जनाधिपा.

५०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सेनासनदायको थेरो इमा गाथायो अभासित्थाति.

सेनासनदायकत्थेरस्सापदानं अट्ठमं.

९. वेय्यावच्चकत्थेरअपदानं

५१. ‘‘विपस्सिस्स भगवतो, महापूगगणो अहु;

वेय्यावच्चकरो आसिं, सब्बकिच्चेसु वावटो [ब्यावटो (सी. स्या.)].

५२. ‘‘देय्यधम्मो च मे नत्थि, सुगतस्स महेसिनो;

अवन्दिं सत्थुनो पादे, विप्पसन्नेन चेतसा.

५३. ‘‘एकनवुतितो कप्पे, वेय्यावच्चं अकासहं;

दुग्गतिं नाभिजानामि, वेय्यावच्चस्सिदं फलं.

५४. ‘‘इतो च अट्ठमे कप्पे, राजा आसिं सुचिन्तितो;

सत्तरतनसम्पन्नो, चक्कवत्ती महब्बलो.

५५. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा वेय्यावच्चको थेरो इमा गाथायो अभासित्थाति.

वेय्यावच्चकत्थेरस्सापदानं नवमं.

१०. बुद्धुपट्ठाकत्थेरअपदानं

५६. ‘‘विपस्सिस्स भगवतो, अहोसिं सङ्खधम्मको;

निच्चुपट्ठानयुत्तोम्हि, सुगतस्स महेसिनो.

५७. ‘‘उपट्ठानफलं पस्स, लोकनाथस्स तादिनो;

सट्ठितूरियसहस्सानि, परिवारेन्ति मं सदा.

५८. ‘‘एकनवुतितो कप्पे, उपट्ठहिं महाइसिं;

दुग्गतिं नाभिजानामि, उपट्ठानस्सिदं फलं.

५९. ‘‘चतुवीसे [चतुनवुते (स्या.)] इतो कप्पे, महानिग्घोसनामका;

सोळसासिंसु राजानो, चक्कवत्ती महब्बला.

६०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा बुद्धुपट्ठाको थेरो इमा गाथायो अभासित्थाति.

बुद्धुपट्ठाकत्थेरस्सापदानं दसमं.

सुधावग्गो दसमो.

तस्सुद्दानं –

सुधा सुचिन्ति चेळञ्च, सूची च गन्धमालियो;

तिपुप्फियो मधुसेना, वेय्यावच्चो चुपट्ठको;

समसट्ठि च गाथायो, अस्मिं वग्गे पकित्तिता.

अथ वग्गुद्दानं –

बुद्धवग्गो हि पठमो, सीहासनि सुभूति च;

कुण्डधानो उपालि च, बीजनिसकचिन्ति च.