३. अड्ढचेळकत्थेरअपदानं

१४. ‘‘तिस्सस्साहं भगवतो, उपड्ढदुस्समदासहं;

परमकापञ्ञपत्तोम्हि [परमकारुञ्ञपत्तोम्हि (स्या. क.)], दुग्गतेन [दुग्गन्धेन (सी.)] समप्पितो.

१५. ‘‘उपड्ढदुस्सं दत्वान, कप्पं सग्गम्हि मोदहं;

अवसेसेसु कप्पेसु, कुसलं कारितं मया.

१६. ‘‘द्वेनवुते इतो कप्पे, यं दुस्समददिं तदा;

दुग्गतिं नाभिजानामि, दुस्सदानस्सिदं फलं.

१७. ‘‘एकूनपञ्ञासकप्पम्हि [एकपञ्ञासकप्पम्हि (स्या.)], राजानो चक्कवत्तिनो;

समन्तच्छदना नाम, बात्तिंसासुं [खत्तियासुं (स्या. क.)] जनाधिपा.

१८. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा अड्ढचेळको थेरो इमा गाथायो अभासित्थाति.

अड्ढचेळकत्थेरस्सापदानं ततियं.