४. सूचिदायकत्थेरअपदानं

१९. ‘‘कम्मारोहं पुरे आसिं, बन्धुमायं पुरुत्तमे;

सूचिदानं मया दिन्नं, विपस्सिस्स महेसिनो.

२०. ‘‘वजिरग्गसमं ञाणं, होति कम्मेन तादिसं;

विरागोम्हि विमुत्तोम्हि [विभवोम्हि विभत्तोम्हि (क.)], पत्तोम्हि आसवक्खयं.

२१. ‘‘अतीते च भवे सब्बे, वत्तमाने चनागते [अतीता च भवा सब्बे, वत्तमाना च’नागता (स्या. क.)];

ञाणेन विचिनिं सब्बं, सूचिदानस्सिदं फलं.

२२. ‘‘एकनवुतितो कप्पे, सत्तासुं वजिरव्हया;

सत्तरतनसम्पन्ना, चक्कवत्ती महब्बला.

२३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सूचिदायको थेरो इमा गाथायो अभासित्थाति.

सूचिदायकत्थेरस्सापदानं चतुत्थं.